પોલીસની પ્રાથમિક તપાસમાં બહાર આવ્યું છે કે મરણ જનાર શબ્બિર જામ અને તેના મિત્ર શબ્બિર કેવરે અરવિંદને ઉછીના દસ હજાર રૂપિયા આપ્યાં હતા. શુક્રવારે ગામમાં મિત્રો જોડે જુગાર રમવા બેઠેલો મૃતક નાણાંની જરૂરિયાત ઊભી થતાં નજીકના મથડા ગામે વાડી વાવનાર અરવિંદ પાસે બાઈક લઈને રૂપિયા લેવા ગયો હતો. તે સમયે અરવિંદ જોડે માથાકૂટ થયેલી.

બીજા દિવસે શબ્બિરના મોટા ભાઈ અને બનેવીએ પૂછપરછ કરતાં અરવિંદે પોતે તેને દસ હજાર રૂપિયા આપી દીધાં હોવાનું તથા બાઈક પર ચંદિયા ગામે તેને મૂકી ગયો હોવાનું જૂઠ્ઠું બોલેલો પણ સીસીટીવી ફૂટેજમાં બેઉ ક્યાંય ના દેખાતાં તેના પરની શંકા સુદ્રઢ થઈ હતી. ગુનાની તપાસ કરનારા પધ્ધરના ઈન્ચાર્જ પીઆઈ સંદિપસિંહ ચુડાસમા, રેગ્યુલર પીઆઈ અમૃતભાઈ પરમાર અને એસઓજી પીઆઈ કુલદિપ ગઢવીએ ટેકનિકલ અને હ્યુમન સોર્સના આધારે પુરાવા એકત્ર કરીને અરવિંદની પૂછપરછ કરતાં તે ભાંગી પડ્યો હતો.