ત્રગડીના લિસ્ટેડ બૂટલેગર યુવરાજ વજુભા જાડેજાએ અબડાસાના ખાનાય ગામના સાથી બૂટલેગર પાર્ટનર જીતુ ઊર્ફે જીતીયો મંગલસિંહ સોઢા તથા નિલેશ નવુભા જાડેજા, સંજય નવુભા જાડેજા, મેહુલ ચંદુભા ઝાલા અને દિવ્યરાજ સુરેન્દ્રસિંહ ઝાલા સાથે મળીને પરપ્રાંતમાં દારુનો જથ્થો મગાવી કટિંગ કરતો હોવાની બાતમીના આધારે પોલીસે રેઈડ કરી હતી.

ઉલ્લેખનીય છે કે ૨૩ મેના રોજ સ્ટેટ મોનિટરીંગ સેલની ટીમે ત્રગડીમાં કટિંગ ટાણે રેઈડ પાડીને યુવરાજે મગાવેલો ૮૩.૭૮ લાખનો ઈંગ્લિશ શરાબનો જથ્થો જપ્ત કરેલો. તે કેસમાં યુવરાજ સાથે દિવ્યરાજ અને મેહુલ ચંદુ ઝાલા વગેરે સાગરીતો સામે ફરિયાદ નોંધાવાઈ હતી. તો, ૯મી જૂલાઈના રોજ એલસીબીએ માંડવીના કોડાય પોલીસ સ્ટેશન વિસ્તારના તલવાણા ગામે રોડ પર પાર્ક કરેલા ગેસ ટેન્કરમાંથી યુવરાજે મગાવેલો ૧.૫૫ કરોડનો શરાબનો જથ્થો જપ્ત કર્યો હતો.

આવો કરોડોનો ઈંગ્લિશ દારૂ અઠવાડિયામાં કેટલી વખત કચ્છમાં ઠલવાય છે? શું આવા દરોડા પોલીસ એક્ટિવ છે તેવું દેખાડવા ખાતર પડે છે? માંડવી, મુંદરા, અબડાસા અને નખત્રાણા પંથકમાં છૂટકમાં ઈંગ્લિશ દારૂ વેચતાં બૂટલેગરો પાસે કેમ કદી માલની અછત નથી સર્જાતી? ACBના કેસ બાદ જિલ્લા બહાર બદલી પામેલો જૂનો વહાલો વહીવટદાર હજુ પણ અહીં પડ્યોપાથર્યો રહીને કોના આશીર્વાદથી માંડવી મુંદરાના બૂટલેગરો પાસે ઉઘરાણાં કરતો ફરે છે? વગેરે પ્રશ્નો ઊંડી વિચારણા માગી લે તેવા છે.