બેકરી માલિક નીતિન ભાનુશાલીએ જણાવ્યું કે ૧૪ જૂલાઈના રોજ સાંજે પોણા આઠ વાગ્યે તેમને અજાણ્યા વોટસએપ નંબર પરથી નીતિન ગરવા નામના શખ્સે પેસ્ટ્રીમાં માખીઓ ઉડતી હોવાની વીડિયો ક્લિપ ફોટો મોકલેલાં. બાદમાં આ શખ્સે ફોન કરીને જણાવેલું કે હું શોપમાં કેક લેવા ગયેલો ત્યારે માખી ઉડતી હતી. જેના ફોટો વીડિયો મેં ઉતારીને મીડિયા ગૃપમાં વાયરલ કર્યાં છે. બેકરી માલિકે બેકરીમાં પૂરતી સ્વચ્છતા રખાતી હોવાનું જણાવતાં આ શખ્સે ફોન કટ કરી દીધો હતો.

એક કલાક બાદ અલી મામદ ચાકીએ માલિકને ફોન કરેલો. તેણે આ વીડિયો વીડી હાઈસ્કુલ પાસે આવેલી તમારી બેકરીનો હોવાનું જણાવીને તેના સમાચાર પ્રગટ કરું છું તેવો દમ મારેલો. બીજા દિવસે અલીયો બેકરી માલિકને મળવા ગયેલો .

આ બધાથી બચવું હોય તો પચાસ હજાર રૂપિયા આપવા પડશે તેમ કહીને ખંડણી માંગેલી. ફરિયાદીએ તેને વિનવણી કરીને સાંજ સુધીનો સમય આપવા વિનંતી કરી હતી.

ફરિયાદીએ સાંજે આ અંગે પિતા અને ભાઈને વાત કરતાં તેમણે બદનામીથી બચવા માટે પચાસ હજાર રૂપિયા આપી દેવા જણાવ્યું હતું. જો કે, બીજા દિવસે અલીયા અને વાજીદ ચાકીની લોકલ ક્રાઈમ બ્રાન્ચે ખંડણી કેસમાં ધરપકડ કરી લીધી હતી અને પછી અલીયાનો ફોન જ આવ્યો નહોતો.

ફરિયાદમાં પોલીસે અલી ચાકી સામે જ ગુનો નોંધ્યો છે. જો કે, અલી ચાકીને આ વીડિયો ફોટો રેકોર્ડ કરીને નીતિન નામના સાગરીતે મોકલેલાં તેમ ફરિયાદમાં જણાવાયું છે.

પોલીસ સૂત્રોએ જણાવ્યું કે નીતિને આ વીડિયો અને ફોટો વોટસએપ અને ટ્વિટર પર પોસ્ટ કરીને ગામમાં વાયરલ કર્યાં હતા.

ઉલ્લેખનીય છે કે આ ગેંગે ભૂતકાળમાં ઠંડા પીણાંની બાટલીઓમાં જીવડાંઓ ફરતાં હોવાના ભ્રામક વીડિયો ફોટા બનાવીને સોશિયલ મીડિયા પર પોસ્ટ કરેલાં છે. ભુજ એ ડિવિઝન પોલીસ ઊંડી ઉતરે તો હજુ નવા ચહેરા અને નવા કાંડ બહાર આવી શકે છે.