વાત જાણે એમ છે કે ગઈકાલે રાત્રે સાડા આઠ નવના અરસામાં દહીંસરાથી થોડે દૂર વેકરા (રામપર) ગામે એક વાડીમાં બોરકૂવાના કેબલ ચોરવા માટે દહીંસરા ગામનો દિનેશ બાબુ કોલી નામનો યુવક ઘૂસ્યો હતો. વાડીમાલિક દિનેશ શિયાણીને જાણ થયાં બાદ ગ્રામજનોની મદદથી સહુએ ઘેરો ઘાલીને દિનેશ બાબુ કોલીને વાડીમાંથી ઝડપી પાડ્યો હતો. દિનેશે અમુક કેબલ કાપી નાખ્યો હતો.

લોકોએ એકઠાં થઈ દિનેશની મારકૂટ કરતાં તેણે એવી કબૂલાત આપી છે કે ‘પોતે અન્ય ત્રણ કોલી યુવકો જોડે મળીને દહીંસરા વાછરડું કાપીને વાડામાં મૂકી આવેલા અને માનકૂવા પોલીસ મથકના રમેશભાઈ નામના જમાદારને આ અંગે બાતમી આપતા પોલીસે વાડામાં દરોડો પાડી મુસ્તાક અને જુસબની ગૌવંશ કતલના ગુનામાં પકડ્યાં હતા’

દિનેશની કબૂલાતનો વીડિયો સોશિયલ મીડિયા પર વાયરલ થતાં માનકૂવા પોલીસે કરેલાં કેસને લઈ ગંભીર સંદેહ સર્જાયો છે. દિનેશ શિયાણીએ પોલીસને જાણ કરીને દિનેશ કોલીને ગઢશીશા પોલીસના હવાલે કરી દઈ તેની સામે મધરાતે અઢી વાગ્યે ફરિયાદ નોંધાવી હતી.

મુસ્લિમ સમાજે આરોપ કર્યો છે કે કેસ કરવાની લ્હાયમાં ગૌવંશની હત્યાનું કાવતરું ઘડાયેલું અને તેમાં બે નિર્દોષ મુસ્લિમ ભાઈઓને ખોટી રીતે ફીટ કરી દેવાયાં છે. AIMIM પાર્ટીના પ્રદેશ મહામંત્રી સકીલ સમાએ જવાબદાર પોલીસ જમાદારને તત્કાળ સસ્પેન્ડ કરવાની માગ કરી જો તે બે દિવસમાં સસ્પેન્ડ ના થાય તો સોમવારે ભુજમાં એસપી કચેરીનો ઘેરાવ કરવાની ચીમકી ઉચ્ચારી છે. અગાઉ નવેમ્બર ૨૦૨૪માં ભુજ બી ડિવિઝન પોલીસ મથકે નોંધાયેલાં ગૌવંશ હત્યાનો એક કેસ પણ આ પ્રકારે કાવતરું ઘડીને ખોટી રીતે કરાયો હતો અને તે સમયે મુસ્લિમ સમાજે ભારે વિરોધ દર્શાવેલો તેનો સમાએ ઉલ્લેખ કર્યો છે.

મુસ્લિમ સમાજ ઉપરાંત દહીંસરા ગ્રામ પંચાયતના સરપંચ ઈન્દુમતીબેન આશાણી, ઉપ સરપંચ વીરમ રબારી સહિતના પંચાયતના સભ્યો અને અગ્રણી ગ્રામજનોએ પણ બેઉ નિર્દોષ માલધારી યુવકોને મુક્ત કરી કાવતરું કરી ગૌવંશ હત્યા કરનાર ચાર યુવકોની ધરપકડ કરવા એસપી કચેરીમાં લેખીત રજૂઆત કરી છે.

દિનેશ કોલીની કબૂલાતનો વીડિયો, સોશિયલ મીડિયા પર મુસ્લિમ સમાજમાં સર્જાયેલાં ઉહાપોહના પગલે પોલીસે પણ મામલાને ગંભીરતાથી લીધો છે. માનકૂવાના પીઆઈ કુલદીપ ગઢવીએ જણાવ્યું કે અમે બનાવની સત્યતા જાણવા આરોપીનો કબજો સુપ્રત કરવા ગઢશીશા પોલીસને જાણ કરી છે.

અમે જ્યારે દહીંસરામાં દરોડો પાડ્યો ત્યારે બેઉ ભાઈઓને રંગેહાથ સ્થળ પરથી પકડ્યાં હતા. કતલ કરાયેલાં વાછરડાનું માંસ વાડાની એક ઓરડીમાં પડેલું.

દિનેશની કબૂલાતની સત્યતા જાણવા માટે ખરેખર દિનેશ સહિતના ચારે આરોપી દરોડા સમયે ક્યાં હતા તે જાણવા તેમના મોબાઈલ લોકેશન સહિતનો ડેટા પણ એકત્ર કરશું. જે જમાદારનું નામ અપાય છે તે રમેશભાઈ તો ક્યાંય ચિત્રમાં જ નથી. ના તો તેણે અમને બાતમી આપેલી કે ના દરોડા સમયે તે અમારી જોડે સામેલ હતો. મુસ્લિમ આગેવાનોએ સમગ્ર ઘટના અંગે અન્ય અધિકારીઓ પાસે તટસ્થ તપાસ કરાવવા માગ કરી છે.