ચકચારી જમીન કૌભાંડ અંગે ગત ૨૨ મેના રોજ હિમાંશુ મકવાણા, સૂત્રધાર નિરોણાના નીતિન ઉમરશી ભાનુશાલી અને પોતાને નોટરીની કચેરીનો સ્ટાફ ગણાવનાર યોગેશ આયડી નામના શખ્સ સામે મુંદરા પોલીસ મથકે ફરિયાદ નોંધાઈ હતી. કેસમાં સરકાર તરફે અધિક જિલ્લા સરકારી વકીલ સુરેશ મહેશ્વરી અને મૂળ ફરિયાદી તરફે એડવોકેટ કુલદીપ જે. મહેતા, કૈલાસદાન ગઢવીએ દલીલો કરી હતી. 

મુંબઈ સ્થાયી થયેલા ૬૬ વર્ષિય ફરિયાદી પ્રફુલ નરશીભાઈ શાહે પોલીસને જણાવેલું કે લુણીમાં તેમના તથા તેમના બે ભાઈ અને એક ભત્રીજાના નામે વિવિધ સર્વે નંબરની સંયુક્ત માલિકીના ખેતરો છે. મુંદરાના જમીન દલાલ હિમાંશુ અને નીતિને ફરિયાદીનો ફોન પર સંપર્ક કરીને આ જમીનો ૧૭.૪૨ કરોડમાં વેચાણ સોદો નક્કી કર્યો હતો.

આરોપીઓ વેચાણની નક્કી થયેલી મૂળ રકમ આપતાં નહોતા. એટલું જ નહીં તેમણે આપેલા ત્રણ ચેક બાઉન્સ થયેલાં. દરમિયાન, આરોપીઓએ સાટા કરારના બે પાનાં બદલીને, ફરિયાદી તથા તેમના ભાઈઓ ભત્રીજાની નકલી સહીઓ, નોટરીના ખોટા સિક્કા મારીને આ ખેતરોના ઓછાં ભાવે અન્યો સાથે સાટા કરાર બનાવેલાં. એટલું જ નહીં, ફરિયાદી સહિતના લોકો સામે મુંદરા કોર્ટમાં ખોટા આરોપ સાથે દિવાની દાવો દાખલ કરેલો.

આ ગુનામાં ત્રણે નાસતાં ફરે છે. નીતિન ભાનુશાલી સામે છેલ્લાં દસ વર્ષ દરમિયાન કચ્છના વિવિધ પોલીસ મથકોમાં આ પ્રકારની અગણિત ફોજદારી ફરિયાદો તથા ચેક બાઉન્સના કેસો નોંધાયેલાં છે. પોલીસને મેનેજ કરવાની ખૂબીના લીધે નીતિન ગામમાં બિન્ધાસ્ત ફરી રહ્યો છે.