શનિવારે બપોરે બાર વાગ્યે સ્મૃતિવન મ્યુઝિયમ સામે ઝાંસી કી રાની સર્કલ પાસે થયેલી લૂંટના બનાવ અંગે ભુજ બી ડિવિઝન પોલીસે ભેદી સંજોગોમાં ૨૬ કલાક બાદ છે..ક આજે બપોરે બે વાગ્યે ફરિયાદ દાખલ કરી છે.

ફરિયાદી ૩૨ વર્ષિય રાજેન્દ્ર મિશ્રા મધ્યપ્રદેશના છત્તરપુર જિલ્લાના હરપાલપુર શહેરની નગરપાલિકાનો નગરસેવક છે. મિશ્રા તેની પત્ની સાથે કચ્છમાં ફરવા આવ્યો છે. ગુરુવારે ઑફિસના કોમ્પ્યુટર ઓપરેટર મહેન્દ્ર સોનીએ ફોન કરીને  રાજેન્દ્રને જણાવેલું કે ભુજમાં બજાર ભાવ કરતાં ૧૫થી ૨૦ ટકા ઓછાં ભાવે સસ્તામાં સોનું આપતી એક વ્યક્તિ જોડે તેનો અગાઉ સંપર્ક થયેલો. મહેન્દ્ર સોનીએ તે શખ્સનો મોબાઈલ નંબર આપીને રાજેન્દ્ર મિશ્રાને સંપર્ક કરવા કહેલું.

રાજેન્દ્ર જ્યુબિલી સર્કલ પર ગયેલો ત્યારે GJ-12 FA-9774 નંબરની એક સફેદ ક્રેટા કારમાં અજાણ્યા માણસને લઈને અબ્દુલ સમા ત્યાં આવેલો અને સોનાનું બિસ્કિટ બતાડવા માટે પોતાના ઘરે આવવા જણાવી તેની ગાડી પાછળ આવવા કહીને તૈયબા ટાઉનશીપમાં લઈ ગયો હતો. અહીં એક ઘરમાં રાજેન્દ્રને સોનાનું બિસ્કીટ બતાડેલું અને પોતે દુબઈથી અહીં લાવીને પંદર વીસ ટકા ઓછા ભાવે વેચાણ કરતાં હોવાનું જણાવેલું. જો કે, હાલ પોતાની પાસે બહુ રુપિયા ના હોવાનું જણાવીને રાજેન્દ્ર પરત લોહાણા મહાજન વાડીમાં રાખેલાં રૂમ પર આવી ગયો હતો.

શનિવારે રાજેન્દ્ર તેની પત્ની સાથે સ્મૃતિવન ફરવા આવ્યો હતો તે સમયે બપોરે બાર વાગ્યે ચીટરોએ તેનો ફરી સંપર્ક કરીને તેને સ્મૃતિવન સામે બાપા સીતારામની મઢુલી પાસે મળવા બોલાવ્યો હતો. રાજેન્દ્ર તેમને મળવા ગયો ત્યારે એ જ સફેદ ક્રેટા કારમાં લઈને આવેલા ત્રણ ચીટરોએ ‘તમારી પાસે જેટલાં રૂપિયા હોય તેટલા રૂપિયા આપો, આ બિસ્કીટ સેમ્પલરૂપે લઈ જાવ, ત્યાંની માર્કેટમાં વેચીને ભરોસો બેસે પછી વેપાર કરજો’ તેવી વાતો કરી હતી.

રાજેન્દ્રએ પણ પોતાની કારથી તેમનો પીછો કરવા પ્રયાસ કર્યો હતો પરંતુ તેઓ ગાયબ થઈ ગયાં હતાં. બી ડિવિઝન પોલીસે ગુનો નોંધી તપાસ હાથ ધરી છે.