ભુજના આ કુખ્યાત બુકી પાસેથી જપ્ત કરેલા ફોનને ચેક કરતાં તેના માસ્ટર આઈડીમાં ૩૦ લાખનું બેલેન્સ હોવાનું સ્પષ્ટ થયું છે. પ્રાથમિક તપાસમાં બહાર આવ્યું છે કે આ માસ્ટર આઈડી મીત રાઠોડ નામના શખ્સે આપી હતી. આરોપીએ રામભાઈ નામના એક ગ્રાહકની આઈડી પણ મળી આવી છે.

ઓમને માસ્ટર આઈડી આપનાર મીત રાઠોડ માધાપરનો રીઢો બુકી છે. અગાઉ સ્ટેટ મોનિટરીંગ સેલની ટુકડીએ ભુજના પ્રમુખ સ્વામીનગરમાં રહેતા બુકી મીત ઊર્ફે બબુ કાન્તિલાલ ઠક્કરની આ જ મોડસ ઓપરેન્ડીથી સટ્ટો રમાડતાં ક્રેટા કારમાંથી ઝડપેલો ત્યારે તેને માસ્ટર આઈડી આપનાર એક શખ્સ તરીકે મીત રાઠોડનું નામ ખુલ્યું હતું.

સામાન્ય મારામારીના બનાવને જેમ હત્યાના પ્રયાસમાં ખપાવીને નિર્દોષ લોકોની મારકૂટ કરી વરઘોડો કાઢવામાં આવે છે તે રીતે માધાપરનો મીત રાઠોડ પકડાય ત્યારે તેનો વરઘોડો તો ઠીક પણ પ્રેસનોટ અને ફોટો પણ જારી કરવામાં આવતાં નથી. બાકી, ‘હું તો હંડ્રેડ પરસન્ટ ઓનેસ્ટ છું’ ‘હું કોઈના બાપથી બીતો નથી’ તેવા ફાલતુ દાવા કરીને મૂછે તાવ દેતા ઘણાં લોકો રાત પડે ને વહીવટદારને ખાનગીમાં દેશી દારૂના બૂટલેગરનો હપ્તો આવ્યો કે નહીં તેવી અચૂક પૃચ્છા કરી લેતાં કંઈક ખાંસાહેબો કચ્છમાં આવીને ક્યારે ખોવાઈ ગયાં તેની પણ આખા ગામને ખબર છે!