નખત્રાણાના ભડલી ગામની વતની રમીલાએ જણાવ્યું કે અગાઉ તેના લગ્ન ભુજમાં થયેલાં. લગ્નજીવન દરમિયાન ત્રણ પુત્રોની માતા બનેલી. જો કે, પતિ જોડે મનમેળ ના આવતાં સાત વર્ષ અગાઉ તે ત્રણે પુત્રોને લઈને પિયર ભડલી રહેવા જતી રહેલી. દરમિયાન, તેને ગામમાં રહેતા ધનજી કાનજી મારવાડા નામના યુવક સાથે મિત્રતા થયેલી. બેઉ જણે સાથે રહેવાનું નક્કી કરેલું.

ગુરુવારે રમીલા તેના અઢી વર્ષના પુત્ર અને મિત્ર ધનજી જોડે ભડલી આવેલી. ગુરુવારે સવારે સાડા નવના અરસામાં ત્રણે જઈ બાઈકથી સુખપર પરત જતા હતા ત્યારે પાયરકા અને મખણા ગામ વચ્ચે કબીરવાડી પાસે પાછળથી સ્કોર્પિયો કાર લઈને આવેલાં દિનેશે ત્રણેને મારી નાખવાના હેતુથી બાઈકને જોરદાર ટક્કર મારેલી.

બનાવ બાદ એકત્ર થઈ ગયેલી પબ્લિકે ત્રણે જણને ૧૦૮ મારફતે જી.કે. જનરલ હોસ્પિટલ ખસેડ્યાં હતા. હુમલામાં રમીલાને જમણા પગે ફ્રેક્ચર અને સાતથી આઠ ટાંકા આવ્યાં છે. પુત્ર અને મિત્ર ધનજીને શરીરે મુઢ માર તથા છોલછાંભ જેવી ઈજાઓ થઈ છે. સામાજિક રાહે સમાધાનની વાતો ચાલતી હોઈ રમીલા ફરિયાદ નોંધાવતા અચકાતી હતી. પોલીસે આરોપી દિનેશની ધરપકડ કરી ગુનામાં વપરાયેલી કાર જપ્ત કરી છે.