ભુજ તાલુકાના ભીરંડિયારા ગામે ભંડારી વાંઢમાં રહેતા ૨૩ વર્ષિય રઝાક વલીમામદ રાયશી નામના યુવકે ગત તારીખ ૧૧ અને ૧૨ જૂનની રાત્રે ઘરથી અડધો કિલોમીટર દૂર હમધાણી વાંઢ જવાના રસ્તે એક વીજ થાંભલા પર લટકીને ગળેફાંસો ખાઈ આપઘાત કરી લીધો હતો.

રઝાકે અંતિમ પગલું ભર્યું તેના થોડાંક દિવસો અગાઉ તેના જીવનમાં ભારે ઝંઝાવાત આવ્યો હતો. આઈશર ટેમ્પોનું ડ્રાઈવીંગ કરતા રઝાકને આદિપુરમાં રહેતા તેના નજીકના સંબંધીની દીકરી અફસાના (નામ બદલેલું છે) સાથે પ્રેમ સંબંધ હતો. અફસાનાના પરિવારની નામરજી હોઈ ૮ એપ્રિલના રોજ રઝાક પ્રેમિકાને લઈ કચ્છ બહાર ભાગી ગયેલો. રઝાકના પરિવારે ધોરડો પોલીસ સ્ટેશનમાં અને અફસાનાના પરિવારે આદિપુર પોલીસ મથકમાં અલગ અલગ ગુમનોંધ લખાવેલી.

રઝાક અફસાનાને રાજસ્થાનના બાડમેર લઈ ગયેલો. અહીં ૧૧ એપ્રિલના રોજ બેઉ જણે મૈત્રી કરાર કરેલાં. ત્યારબાદ ૧૭ એપ્રિલના રોજ બેઉ જણે નિકાહ કરી લીધેલાં. દરમિયાન, રઝાક અફસાના જોડે રાજસ્થાનમાં હોવાનું સ્પષ્ટ થતાં રઝાકના સંબંધી જુણસ નુરમામદ રાયશી અને કમાલશા સૈયદ બેઉને ૨૨ એપ્રિલે રાજસ્થાનથી ભંડારી વાંઢ પરત લઈ આવેલાં. અફસાના અંગે ગુમ નોંધ દાખલ કરાવાઈ હોઈ બંનેને આદિપુર પોલીસ મથકે રજૂ કરાયેલાં. તે સમયે સમાજના આગેવાનોએ થોડાંક સમયમાં એકબીજા સાથે લગ્ન કરાવી દેવાનું નક્કી કરીને બંને પક્ષ વચ્ચે સમાધાન કરાવેલું.

અચાનક ૧ મેના રોજ અફસાનાએ રઝાક સામે આદિપુર પોલીસે સ્ટેશનમાં બળાત્કારની ફરિયાદ નોંધાવેલી. અફસાનાએ લખાવેલું કે ડિસેમ્બર માસમાં રઝાકે તેના ઘરની પાછળ તેની સાથે બળજબરીથી દુષ્કર્મ આચરેલું. આ કેસમાં આદિપુર પોલીસે બીજી મેના રોજ રઝાકની ધરપકડ કરી તેને જેલમાં મોકલી આપેલો.

રઝાક એક માસથી જેલમાં હતો તે સમયે ૫ જૂનના રોજ અફસાનાના ભીરંડિયારાના દરિયા ગુલાબી રાયશી સાથે નિકાહ કરી દેવાયા હતા. અફસાનાના નિકાહ થયાના બીજા દિવસે ૬ જૂનના રોજ રઝાક જામીન પર જેલ બહાર આવેલો અને અફસાનાના બીજા નિકાહની વાત જાણીને તેના પગ નીચેની ધરતી ખસી ગઈ હતી. એટલું જ નહીં, રાજસ્થાનથી તેને સમજાવી પરત લઈ આવનાર કમાલશા સૈયદે જ પીઠ પાછળ ભૂંડી ભૂમિકા ભજવી હોવાની ખબર પડતાં ખૂબ હતાશ થઈ ગયેલો.

ઘટના અંગે ધોરડો પોલીસે જામીન સુમાર રાયશી, ઈશાક સુમાર રાયશી, કમાલશા અલીશા સૈયદ, ગુલાબી રમજાન રાયશી, દરિયા ગુલાબી રાયશી વિરુધ્ધ ભારતીય ન્યાય સંહિતાની કલમ ૧૦૮ અને ૩ (૫) હેઠળ ફરિયાદ દાખલ કરી તપાસ હાથ ધરી છે.