હુમલાખોર રાહુલ ઊર્ફે માસાડો કરસન મારવાડા (રહે. વાલારામનગર, કોડકી રોડ, ભુજ) ૨૦-૦૭-૨૦૨૪ની મધરાતે ભુજના કુકમામાં આવેલા અવધનગરમાં રહેતા રમેશ પુંજાભાઈ મારવાડાની થયેલી હત્યાના કેસનો સહઆરોપી છે. આ કેસમાં હુમલાખોર રાહુલ મારવાડા, સચિન મુળજીભાઈ મેરિયા, અરુણ ઊર્ફે લાલો રામજીભાઈ મારવાડા, કિરણ ખીમજી પાયણ નામના ચાર આરોપી જામીન પર મુક્ત છે, કિશન મુળજીભાઈ મારવાડા નામનો પાંચમો આરોપી હજુ જેલમાં છે. કેસમાં મુદ્દત હોઈ આજે સવારે રાહુલ સહિતના અન્ય આરોપીઓ કૉર્ટમાં હાજર થયેલાં. તે સમયે અરુણના કાકા હિરજી પાયણ સાથે મિત્ર મયૂરગર મહેશગર ગુંસાઈ (ઉ.વ. ૨૫, રહે. રામનગરી, આત્મરામ સર્કલ પાસે, ભુજ) કૉર્ટમાં તેમને મળવા ગયેલો.

હુમલાખોર રાહુલ અને મયૂર વચ્ચે અગાઉ ઝઘડો થયેલો. ગઈકાલે મોબાઈલ પર બેઉ વચ્ચે બબાલ થયેલી. સૌ આરોપી કૉર્ટની કેન્ટિન બહાર પાર્કિંગ નજીક ઊભાં હતા ત્યારે રાહુલ, અરુણ અને કિરણ એકમેક પર દોષારોપણ કરીને ઝઘડવા માંડેલાં.

આ સમયે અન્ય કેસની મુદ્દતે કૉર્ટમાં આવેલા DySP ક્રિશ્ચિયન અને અન્ય સ્ટાફે વચ્ચે પડીને રાહુલને વધુ હુમલો કરતો અટકાવી તેની પાસે રહેલી છરી ઝૂંટવી લેવડાવી હતી.

મયૂરને પેટમાં જમણા ભાગે બેથી અઢી ઈંચ જેટલો ઊંડો ઘા વાગ્યો છે. સમયસર સારવારના લીધે બચી ગયો છે. પોલીસ ગિરફ્તમાં રહેલા રાહુલ વિરુધ્ધ મયૂરે હત્યાના પ્રયાસ સહિતની કલમો તળે ફરિયાદ નોંધાવી છે.