ભુજની જૂની રાવલવાડીમાં રહેતા મહિલા એજન્ટ ભારતીબેન હેમંતભાઈ શાહે જણાવ્યું કે ૨૦૧૪માં કંપનીના ભુજના એજન્ટ રાજુ ઠક્કર મારફતે તે આ કંપની અને તેની રોકાણની યોજનાઓ અંગે પરિચિત થયેલાં. પોતાના છ લાખ રૂપિયાની એફડી કરવાથી તેમણે શરૂઆત કરેલી બાદમાં એજન્ટ તરીકે જોડાયેલાં.

યુનિક મર્કેન્ટાઈલ ઈન્ડિયા લિમિટેડ અને યુનિક મલ્ટીસ્ટેટ મલ્ટી પર્પઝ કો-ઓપરેટીવ સોસાયટી લિમિટેડના ચેરમેન રાજકુમાર કૈલાસ રાય, એમડી રાહુલ રાજકુમાર રાય, ઉત્કર્ષ રાજકુમાર રાય, ઉષા રાજકુમાર રાય અને જનરલ મેનેજર હસમુખ ડોડિયા અવારનવાર ભુજની વિવિધ હોટેલમાં રોકાણકારોની જાગૃતિ માટે સેમિનારનું આયોજન કરતાં. એજન્ટોને મહત્તમ રોકાણ લઈ આવવા બદલ ઊંચું કમિશન મળવા સાથે વિદેશ ટૂર અને ગિફ્ટની લાલચ આપતાં.

અમુક જણને કેવળ ૯.૨૭ લાખ જ પરત મળ્યાં છે. ભુજ બી ડિવિઝન પોલીસે કંપનીના ચેરમેન સહિતના જવાબદાર પદાધિકારીઓ સામે ગુજરાત પ્રોટેક્શન ઈન્ટરેસ્ટ ઑફ ડિપોઝીટર્સ એક્ટ ૨૦૦૩ની કલમ ૩ તથા ભારતીય ન્યાય સંહિતાની કલમ ૩૧૬ (૨), ૩૧૮ (૩) અને (૪), ૫૪ની કલમો તળે ગુનો નોંધી તપાસ શરૂ કરી છે.

આ કંપની સામે ભૂતકાળમાં પણ ભુજ એ ડિવિઝન, ગાંધીધામ બી ડિવિઝન, અંજાર પોલીસ મથકમાં આ જ પ્રકારે કરોડો રૂપિયાની ઠગાઈની ફરિયાદો દાખલ થયેલી છે. ફરિયાદો અન્વયે આરોપીઓની ધરપકડ પણ થયેલી છે અને પાછળથી આરોપીઓ જામીન પર આઝાદ થઈ ગયેલાં છે.

આ કંપની સામે અગાઉ જામનગર, મહેસાણા, અમદાવાદ, હૈદ્રાબાદ સહિતના સ્થળોએ છેતરપિંડીની ફરિયાદો નોંધાયેલી છે. અમારી કંપની ૧૧ હોટેલ ધરાવે છે અને વિવિધ વિસ્તારોમાં પ્લોટીંગની સ્કિમ ધરાવે છે તેમ જણાવી કંપની રોકાણકારોને બાટલીમાં ઉતારતી હતી. કોરોનાના લીધે નાણાંભીડ હોવાનું બહાનું આગળ ધરીને કંપની રોકાણકારોના રૂપિયાનું ફૂલેકું ફેરવી નાખેલું. ભૂતકાળમાં અમદાવાદના આશ્રમ રોડ પર આવેલી કંપનીની ઑફિસમાં રોકાણકારોએ ભારે હોબાળો પણ મચાવ્યો હતો.