કૌભાંડ અંગે ૨૨-૦૫-૨૦૨૬ના રોજ નખત્રાણા નિરોણા ગામના સૂત્રધાર નીતિન ઉમરશી ભાનુશાલી, તેના સાગરીત યોગેશ આયડી અને હિમાંશુ મકવાણા સામે મુંદરા પોલીસ મથકે મુંબઈ સ્થાયી થયેલાં ૬૬ વર્ષિય પ્રફુલ્લ શાહે ફરિયાદ નોંધાવેલી. આરોપીએ કાવતરું રચીને પહેલાં ફરિયાદીનો સંપર્ક કરી લુણીમાં પ્રફુલ્લભાઈ અને તેમના ભાઈ-ભત્રીજાઓની સંયુક્ત માલિકીની ખેતીની જમીનો ૧૭.૪૨ કરોડમાં ખરીદવા સોદો નક્કી કરેલો. ત્યારબાદ ટુકડે ટુકડે ૬૭ લાખ રૂપિયા આપીને સાટા કરાર બનાવેલો.

યોગેશની અરજીની સુનાવણી દરમિયાન કૉર્ટે પોલીસ પેપર્સ અને વકીલે કરેલી દલીલોના આધારે જણાવ્યું કે યોગેશે સાટા કરારમાં સહીઓ લેવા સહઆરોપીઓ સાથે મુંબઈ ગયેલો. નોટરી વખતે પણ તે હાજર હતો. મૂળ સાટા કરારના બે પાનાં ગાયબ કરીને બોગસ દસ્તાવેજ ઊભો કરવામાં તેણે નકલી સહી સિક્કા કર્યાંનું પ્રથમ દ્રષ્ટિએ જણાઈ આવે છે. નોટરીના રજિસ્ટરમાં આવા કોઈ દસ્તાવેજની નોંધણી જ થયેલી નથી. ગુનાનો સૂત્રધાર નીતિન ભાનુશાલી હજુ પકડાયો નથી, ગાયબ થયેલાં બે પાનાં હજુ મળ્યાં નથી, ગુનાની તપાસ હજુ ચાલુ છે વગેરે ગ્રાઉન્ડ પર ત્રીજા અધિક સેશન્સ જજ વી.એ. બુધ્ધે નિયમિત જામીન અરજી ફગાવી દીધી છે. આ કેસમાં ફરિયાદ પક્ષે એડવોકેટ સુરેશ એ. મહેશ્વરીએ દલીલો કરી હતી.