ભુજની આરટીઓ સાઈટ ખાતે રહેતા ફરિયાદી પ્રિયેન મહેશભાઈ ગોરે કોડાય પોલીસને જણાવ્યું કે મરણ જનાર ૩૬ વર્ષિય ચિંતન કિશોરભાઈ ગોર (રહે. મઢી ફળિયું, આરટીઓ સાઈટ) તેનો માસિયાઈ ભાઈ થતો હતો. ગઈકાલે ચિંતને માંડવી ફરવા જવાનું કહેતાં ફરિયાદી અને તેનો મિત્ર પ્રશાંત રાજગોર એમ ત્રણે જણ સાડા બારના અરસામાં પ્રશાંતની સ્વિફ્ટ કારથી માંડવી બીચ ફરવા ગયેલાં. બપોરે સવા ત્રણ વાગ્યે ભુજથી જીગર દીપકભાઈ ગોર (રહે. મઢી ફળિયું, આરટીઓ સાઈટ)નો ચિંતનને ફોન આવેલો.

ચિંતને તેનો ફોન સ્પીકર મોડ પર રાખ્યો હોઈ બંનેની વાતચીત ફરિયાદી અને પ્રશાંત પણ સાંભળતા હતા. થોડીકવાર બાદ જીગરે ચિંતનને ફરી ફોન કરેલો અને ૨૦ રૂપિયા આપવાનું કહીને તેને જખણિયા બોલાવ્યો હતો.

પાંચ વાગ્યે જખણિયા પહોંચતા જાહેર રોડ પર ચાની હોટેલ પાસે જીગર અને તેનો સાળો જય દીપક ગોર (રહે. આશાપુરાનગર, સરપટ નાકા બહાર, ભુજ) બેઉ સફેદ હ્યુન્ડાઈ વેન્યૂ કાર લઈને ઉભેલાં નજરે ચઢેલાં. ચિંતને જીગરને મળી થોડી વાતચીત કરી, ફરીથી ગાડીમાં બેસીને ફરિયાદીને કહેલું કે જીગર ગામના વથાણમાં આવીને રૂપિયા આપવાનું કહે છે, આપણી ગાડી પાછળ પાછળ તે આવે છે.

વથાણમાં પહોંચ્યા બાદ ચિંતન જેવો ગાડીમાંથી બહાર નીકળ્યો કે સાળો બનેવી બેઉ છરી વડે આડેધડ રીતે ચિંતન પર તૂટી પડ્યાં હતા. ગંભીર ઈજાથી ચિંતન નીચે ફસડાઈ પડ્યો ત્યારબાદ પણ બેઉ જણે છરીના ઘા મારવાનું ચાલું રાખેલું.

જીગરે ફરિયાદીને ગરદન પર ઝાપટ પણ મારી હતી. હુમલા બાદ બેઉ જણ કારમાં બેસી નાસી છૂટ્યાં હતાં. ચિંતનને ગંભીર હાલતમાં ગાડીમાં લઈ ફરિયાદી અને પ્રશાંત બેઉ ભુજ આવવા રવાના થયા હતાં. ૧૦૮ને ફોન કરી દીધો હોઈ પુનડી નજીક એમ્બ્યુલન્સ સામે મળતાં ફરિયાદી ચિંતનને લઈ તેમાં બેસી ગયો હતો. જો કે, દહીંસરા વટાવ્યાં બાદ ચિંતનનો શ્વાસ બંધ પડી ગયો હતો.