બાતમીના આધારે લોકલ ક્રાઈમ બ્રાન્ચે મુંદરા માંડવી હાઈવે પર તલવાણા ગામના પાટિયા નજીક ઓમ બન્ના હોટેલ પાસે રોડ પર ઊભેલું GJ-06 AU-6669 નંબરના ગેસ ટેન્કરમાંથી શરાબનો આ ઐતિહાસિક કિંમતનો જંગી જથ્થો જપ્ત કર્યો છે. ટેન્કરમાં સવાર રાજસ્થાનના ડ્રાઈવર અને ક્લિનર ઉપરાંત યુવરાજના માણસ રામદેવસિંહ ઊર્ફે ઋતુરાજસિંહ પ્રવિણસિંહ જાડેજા (રહે. ગુંદિયાળી, માંડવી)ની ધરપકડ કરી છે.

યુવરાજ અને અબડાસાના ખાનાયના અન્ય એક રીઢા બૂટલેગર જીતુભા ઊર્ફે જીતિયો મંગલસિંહ સોઢા બેઉ જણે ભેગાં મળીને માલ મગાવ્યો હતો. LCBએ ૧૦ લાખનું ટેન્કર, ૪૦ હજારના ૩ મોબાઈલ ફોન મળી કુલ ૧ કરોડ ૬૪ લાખ ૨૬ હજાર ૫૦૦ રૂપિયાનો મુદ્દામાલ કબજે કરી માલ મોકલનાર, લાવનાર, મગાવનાર મળી છ આરોપી સામે કોડાય પોલીસ મથકે પ્રોહિબિશનની વિવિધ ધારાઓ તળે ફરિયાદ નોંધાવી છે.

૪૭ દિવસની અંદર બે જુદાં જુદાં દરોડામાં યુવરાજે મગાવેલો કુલ ૨.૩૭ કરોડનો ઈંગ્લિશ શરાબ જપ્ત થયો છે. આમ તો એવું કહેવાય છે કે પોલીસ ધારે તો પાતાળમાંથી પણ ગુનેગારને પકડી લાવે છે પરંતુ આ કિસ્સામાં સૂત્રધાર પોલીસને હાથ લાગતો નથી પરંતુ તે કરોડોનો શરાબ મગાવી તે વાહનનું બિન્ધાસ્ત રીતે પાયલોટીંગ કરી લે છે!

આટ-આટલો શરાબ ઝડપાતો હોવા છતાં મુખ્ય મથક ભુજ સહિત પશ્ચિમ કચ્છના તદ્દન અંતરિયાળ વિસ્તારોમાં માંગો તે બ્રાન્ડની શરાબની બાટલી પ્યાસીઓને તો અડધી રાતે પણ તરત મળી જાય છે!!