બનાવ અંગે પાંચ માર્ચે ભુજ બી ડિવિઝન પોલીસ મથકે ફરિયાદ નોંધાયેલી. શિક્ષકના પુત્રી પુત્ર દેશ વિદેશ સ્થાયી થયેલાં છે. તેમના પત્ની દિલશાદબેન ઘર પાસે બ્યૂટી પાર્લર ચલાવે છે. બી ડિવિઝન પોલીસે ઘણી શોધખોળ કરી પરંતુ આરોપીઓનો કોઈ અતોપત્તો મળ્યો નહોતો.

પાપનો ઘડો ફૂટ્યાં વગર રહેતો નથી. પોલીસે ઝીણવટભરી તપાસ કરતાં બહાર આવેલું કે દિલશાદબેનના બ્યૂટી પાર્લરમાં કુસુમ નારણભાઈ વરસાણી (પટેલ) નામની મહિલા અવારનવાર આવતી જતી રહેતી હતી. ઘણીવાર કુસુમ સાથે જાનકી પ્રદીપભાઈ ચાવડા (બંને રહે. ઉમેદનગર કોલોની, ભુજ) અને મુમતાઝ ઊર્ફે રઝીયા લિયાકત ઉન્નડ (જૂની બકાલી કોલોની, ભુજ) મેક અપ કરાવવા આવતા હતા.

તેમણે ખાનગી રાહે તપાસ આદરી અને તેમનો શક સાચો ઠર્યો. પોલીસે જણાવ્યું કે મેકઅપ કરાવવા આવેલી કુસુમે દિલશાદબેન કાનમાં સોનાના બુટિયાં જોયાં નહોતાં. વાત-વાતમાં ખબર પડી કે તેમણે પૈસા અને દર-દાગીના ઘરમાં સંતાડીને રાખી દીધાં છે.

ગુનાહિત માનસિક્તા ધરાવતી કુસુમ પટેલે તેમના ઘરમાં હાથ મારવાનો પ્લાન બનાવીને મુમતાઝ અને જાનકીને સામેલ કરેલાં. પ્લાન એવો બનાવેલો કે એક જણી મેકઅપ કરાવતી હોય ત્યારે બાકીની બે જણી દિલશાદબેનનું ધ્યાન ચૂકાવીને યુક્તિપૂર્વક ઘરમાં ઘૂસીને ઘરેણાં ચોરી લે. તેમનો આ પ્લાન સફળ રહેલો અને મોટો હાથ મારીને ત્રણે જણી ફરાર થઈ ગયેલી.

પોલીસે ત્રણે બાઈઓની ધરપકડ કરીને ૮.૨૪ લાખના મૂલ્યની ૭૪.૭૪૦ ગ્રામની સોનાની લગડી અને ૫૧ હજાર રોકડાં મળીને ૮.૭૫ લાખનો મુદ્દામાલ રીકવર કર્યો છે.

પોલીસ રેકોર્ડ મુજબ જાનકી ચાવડા અને કુસુમ વરસાણી બેઉ હની ટ્રેપના ગોરખધંધાની જૂની ખેલાડી છે. જાનકીએ ૨૦૧૭માં ભુજના ઓધવપાર્ક ૦૨માં નજીકના મકાનમાં ફિરોઝ અને ઈમરાન નામના બે સાગરીતો સાથે મળીને આંગણામાં પડેલી ચાવીથી તાળું ખોલીને ૨૫ હજાર રોકડાં અને ૩૦ હજારના દાગીના મળી ૫૫ હજારની ચોરી કરેલી. જે અંગે ભુજ એ ડિવિઝન પોલીસ મથકે ૦૭-૦૩-૨૦૧૭ના રોજ ત્રણે સામે ફરિયાદ નોંધાઈ હતી.

કુસુમ અને જાનકીની જોડીએ ગાંધીધામમાં કંડલા પોર્ટના નોકરિયાતને નિશાન બનાવી, વીડિયો વાયરલ કરવાની તથા રેપની ફરિયાદ નોંધાવવાની ધમકી આપી બ્લેકમેઈલ કરીને અન્ય સાગરીતો સાથે મળીને ટુકડે ટુકડે ૨૩ લાખ પડાવેલાં. જે અંગે ૨૧-૧૨-૨૦૨૪ના રોજ ગાંધીધામ એ ડિવિઝનમાં ફરિયાદ નોંધાયેલી.

કુસુમે ભુજના એક તોડબાજ પત્રકાર સાથે મળીને બે ત્રણ વર્ષ અગાઉ માંડવી નજીક આવેલા ગુરુકુળના યુવાન સંતને હની ટ્રેપ કરી, ફોન સેક્સની ક્લિપના આધારે ખંડણી માંગેલી. તે અંગે કચ્છખબરે પર્દાફાશ કરતાં કુસુમ અને તોડબાજ પત્રકાર બેઉ ફફડી ગયેલાં. પોલીસે પણ તપાસ શરૂ કરતાં બેઉ જણે માફામાફી કરીને વીડિયો ડિલિટ કરી દઈને ફરિયાદથી બચી ગયાં હતાં. આ તોડબાજે તાજેતરમાં અન્ય એક સંતને પણ હની ટ્રેપ કર્યો હોવાનું ચર્ચાઈ રહ્યું છે. મુમતાઝ સામે પણ ૨૦૧૭માં માનકૂવા પોલીસ મથક અને ૨૦૨૨માં ભુજ એ ડિવિઝન પોલીસ મથકે આવી ફરિયાદો નોંધાયેલી છે. ભુજ બી ડિવિઝન પીઆઈ એ.એમ. હેરમા અને પીએસઆઈ એચ.એમ. પટેલ, ઝેડ.એમ. મલેક સહિતની ટીમની મહેનત રંગ લાવી છે.