માધાપર નવા વાસમાં ગંગેશ્વર રોડ પર આવેલા ફાર્મ હાઉસ માધવ બાગના A-4 બંગ્લૉમાં IPLની મેચો પર ઓનલાઈન સટ્ટો રમાડાતો હોવાની બાતમીના આધારે LCBની ટીમે સાંજે દરોડો પાડીને મકાનમાલિક નિલેશ પ્રતાપભાઈ નંદા (ભાનુશાલી) (ઉ.વ. ૫૦)ને ઝડપ્યો હતો. બંગ્લૉના ઉપરના માળે આવેલા રૂમમાંથી ધર્મેશ પ્રવિણભાઈ ચોથાણી (ઠક્કર) (ઉ.વ. ૪૯ રહે. મુલુંડ વેસ્ટ, મુંબઈ) અને નિલેશ હરેશભાઈ ભોજવાણી (ઉ.વ. ૨૪ રહે. કલ્યાણ, મુંબઈ) પણ ઝડપાયાં હતા.

રૂમમાં બે રહેલા લેપટોપ ચાલુ હાલતમાં જોવા મળેલાં અને ટેબલ પર સટ્ટો બુક કરવા માટે પાંચ ફોન પડેલા જોવા મળેલાં. એક લેપટોપમાં ચેક કરતાં વિનર-7 નામની ઓનલાઈન એપ જોવા મળેલી, જેમાં મેચના ભાવ જોવા મળતાં હતા. બીજા મોબાઈલમાં iAssistant નામની એપ્લિકેશન જોવા મળેલી. આ એપ્લિકેશનમાં બંને ટીમો પર હાર અને જીત તથા એક ઓવરમાં કેટલાં રન થશે તેના તફાવત પર જે લોકો રૂપિયા લગાડતાં હતા તેમને લગતી વિગતોની એન્ટ્રીઓ જોવા મળી હતી.

બુકી ત્રિપુટીની જડતીમાંથી તેમના અંગત વપરાશ માટેના વધુ ત્રણ ફોન મળી પોલીસે ૪૦ હજારના કુલ ૮ મોબાઈલ ફોન, ૨૦ હજારની કિંમતના બે લેપટોપ, ઈન્ટરનેટ કનેક્ટીવીટી માટે વપરાતું જીઓ કંપનીનું રાઉટર, એડેપ્ટર સાથેનું ટીવી વગેરે મળી ૭૬ હજારનો મુદ્દામાલ કબજે કરી ઝડપાયેલી ત્રિપુટી તથા જાપાન અને પેરીસ લાઈન પર સોદા કરનાર અજ્ઞાત ઈસમો વિરુધ્ધ માધાપર પોલીસ મથકે જુગાર અટકાયતી અધિનિયમની કલમ ચાર અને પાંચ તળે ફરિયાદ નોંધાવી છે.