કચ્છની વિવિધ નગરપાલિકા અને તાલુકા જિલ્લા પંચાયતની મહત્વની બેઠકો પર  AIMIM ઉમેદવારોને મેદાને ઉતારશે. AIMIMના આયોજનથી આ વખતનો જંગ ભારે ગળાકાપ બનવાની ધારણા છે.

આમ તો ગુજરાતની તાસિર મુજબ ક્યારેય ત્રીજો પક્ષ કદી ફાવ્યો નથી. પરંતુ, જે પ્રકારે રાજકારણમાં ધર્મ, સંપ્રદાય અને નાત-જાતનું વર્ચસ્વ વધી ગયું છે તેના કારણે ત્રીજા પક્ષોની હાજરીથી પરિણામોમાં ભારે અપસેટ સર્જાય છે. ઓવૈસીની  આજની ગુજરાત મુલાકાત ટાણે ચૂંટણી સ્ટ્રેટેજી અંગે ભુજના યુવા આગેવાન અને પાર્ટીના પ્રદેશ મહામંત્રી સકીલ સમાએ ચર્ચા કરી માર્ગદર્શન મેળવ્યું છે. સમાએ જણાવ્યું કે અમે લોકો સાથે કનેક્ટ હોય તેવા ગ્રાસ રૂટ સાથે જોડાયેલાં કાર્યકરોને ટિકિટ આપવા પર ફોકસ કરી રહ્યાં છીએ. ભાજપના શાસનમાં જે પ્રકારે મુસ્લિમો અને દલિતોની સરેઆમ અવગણના થઈ રહી છે તે જોતાં લોકો ત્રીજા વિકલ્પ પર આશાભરી મીટ માંડીને બેઠાં છે.

ભુજ, માંડવી મુંદરા, અબડાસા લખપતને સમાવતી નખત્રાણા, ગાંધીધામ જેવી વિધાનસભા બેઠકો પર મુસ્લિમો અને દલિતોનો ઝોક ખૂબ અસરકર્તા છે. મુસ્લિમો અને દલિતોના મત કોંગ્રેસ ભાજપ જેવા મુખ્ય રાજકીય પક્ષોના ઉમેદવારોની હાર-જીતના સમીકરણો ફેરવી નાખવા સમર્થ છે. છેલ્લે યોજાયેલી ભુજ વિધાનસભાની ચૂંટણીમાં ભાજપ અને કોંગ્રેસ બાદ AIMIMને સૌથી વધુ મત મળ્યાં હતા.

કોંગ્રેસના પરાજીત ઉમેદવાર અરજણ ભુડીયાને મળેલાં ૩૬ હજાર ૭૬૮ મતની તુલનાએ AIMIMના ઉમેદવાર સકીલ સમાને ૩૧ હજાર ૨૯૫ મત મળ્યાં હતા. ભુજ શહેરના ૧૧ વૉર્ડ, બન્ની પચ્છમના અનેક ગામોમાં કોંગ્રેસ કરતાં AIMIMના ઉમેદવારને વધુ મળ્યાં હતા. ગુજરાતમાં એકમાત્ર સમા એવા ઉમેદવાર બની રહ્યાં હતા કે જેને સૌથી વધુ મત મળેલાં.

સ્થાનિક સ્વરાજ્યની ચૂંટણીઓ રાષ્ટ્રીય મુદ્દાઓ પર નહીં પરંતુ લોકોને સ્પર્શતાં પાયાના મુદ્દાઓ પર લડાય છે. શેરીએ શેરી જતાં ઉમેદવારોના નામ અને ચહેરાંને મતદારો સારી પેઠે ઓળખતાં હોય છે. રસ્તા, ગટર, સફાઈ, વીજળી, પાણી વગેરે જેવા અનેક પાયાનાં મુદ્દાઓ જ મહત્વના બની રહેતાં હોય છે.