લાંબા અંતરની ટ્રેનોમાં ઓવરક્રાઉડીંગ (વધુ પડતી ભીડ)ની સમસ્યાને નિવારવા ભારતીય રેલવેએ ૪૬ ટ્રેનોમાં વધારાના ૯૨ જનરલ કમ્પાર્ટમેન્ટ દોડાવવાનો નિર્ણય કર્યો છે. આ નિર્ણય અંતર્ગત કચ્છથી મુંબઈ વચ્ચે દોડતી સયાજીનગરી એક્સપ્રેસ અને બાંદ્રા ભુજ સુપરફાસ્ટ એક્સપ્રેસમાં વધારાના જનરલ ડબ્બા જોડવામાં આવ્યાં છે. ભાવનગર બાંદ્રા સુપરફાસ્ટ તથા વેરાવળ બાંદ્રા વચ્ચે દોડતી સૌરાષ્ટ્ર જનતા એક્સપ્રેસમાં પણ વધારાના જનરલ કોચ જોડવામાં આવ્યાં છે.

બીજી તરફ, કોરોના બાદ ટ્રેનોમાં સિનિયર સીટીઝનોને મળતી ભાડાની રાહતો પરત ખેંચાઈ ગઈ છે. ભયંકર મોંઘવારી અને બેકારીના કારણે દેશનો ગરીબ જ નહીં મધ્યમવર્ગ પણ કમ્મરતોડ ભાડાં ચૂકવવાના બદલે ‘સસ્તું ભાડું ને સિધ્ધપુરની જાત્રા’ની કહેવતની જેમ નછૂટકે જનરલ ડબ્બામાં પ્રવાસ કરવા માંડ્યો છે. જગ્યા ના મળે તો લોકો આરક્ષિત એસી કોચમાં ઘૂસીને ધરાર મુસાફરી કરવા માંડ્યાં હતાં.

દેશની શાણી જનતાએ ચારસો પારના નારા પોકારતા ભાજપને ૨૪૦ સીટની મર્યાદામાં લાવી દીધો તે પછી મોદી સરકારને સરકારી અનાજ ખાઈને જીવતી એંસી કરોડ જનતાને ડગલે ને પગલે પડતી બેહાલીની વાસ્તવિક પરિસ્થિતિનું કદાચ ભાન થયું છે. હજુ વધુ ૨૨ ટ્રેનોમાં પણ વધારાના જનરલ ડબ્બા જોડવામાં આવશે તેવું આશ્વાસન અપાયું છે.