શહેરની વીડી હાઈસ્કુલ સામે ઓરિએન્ટ કોલોનીમાં રહેતા એડવોકેટ મલ્હાર દર્શકભાઈ બુચ મામાના ઘેર કૌટુંબિક જમણવાર હોઈ બપોરે એક વાગ્યે ઘરને તાળાં મારીને સપરિવાર મામાના ઘેર ગયેલાં. બપોરે ૨.૨૦ વાગ્યે ઘરે પરત ફર્યાં તો તસ્કરોએ ઘરમાંથી  ચોરી કરી હોવાનું માલૂમ પડ્યું હતું. બનાવ અંગે ભુજ બી ડિવિઝન પોલીસે ગુનો નોંધી તપાસ હાથ ધરી છે.

છેલ્લાં ત્રણ દિવસમાં ગાંધીધામના ઘરફોડ ચોરીના બે બનાવ નોંધાઈ ચૂક્યાં છે. ૨૮ ઑગસ્ટે નવી સુંદરપુરીના ભરવાડ વાસમાં રહેતો યુવક સવારે ૧૦થી બપોરે ૩ વાગ્યા દરમિયાન ઘર બંધ કરીને ભારતનગરમાં ફોઈના ઘેર વાસ્તુ પ્રસંગે હાજરી આપવા સપરિવાર ગયેલો. પરત ફર્યો ત્યારે તસ્કરો ૧૫ હજાર રોકડ અને ઘરેણાં મળી ૧ લાખ ૯૪ હજારની માલમતા ચોરી ગયાં હોવાનું સ્પષ્ટ થયું હતું. તો, ૨૯-૩૦ ઑગસ્ટની રાત્રે ગુરુકુળ વિસ્તારમાં તસ્કરોએ આઈઓસીના મેનેજરના બંધ ઘરમાંથી ૨૫ હજાર રોકડાં અને ઘરેણાં મળી ૫૧ હજારની માલમતાની ચોરી કરેલી. વીજળી ગુલ થતાં ફરિયાદી કંટાળીને ઘર બંધ કરીને હોટેલમાં સૂવા ગયેલાં. બીજી તરફ, આજે અંજાર પોલીસ મથકે ૨૦ જૂલાઈથી ૨૩ જૂલાઈ વચ્ચે મેઘપર કુંભારડીના ગોપાલ પાર્કમાં બંધ ઘરમાં થયેલી ૩૨ હજાર રોકડ અને દાગીના મળી ૭૮ હજાર ૫૦૦ રૂપિયાની માલમતાની ચોરીની ફરિયાદ દાખલ થઈ છે.

રોજ દિવસ ઉગે ને દરેક પોલીસ સ્ટેશનના અડધો સ્ટાફ અડધા કે આખા દિવસ માટે પ્રોહિબિશન, આર્મ્સ, જુગાર કે ટ્રાફિક વગેરેની ડ્રાઈવમાં જોતરી દેવાય છે. પોલીસ ખાતું પણ યાંત્રિક રીતે ઢગલાબંધ કેસો દાખલ કરીને કામ કર્યાનો સંતોષ માની લે છે. પોલીસ સ્ટાફની ભયંકર ઘટ પ્રવર્તે છે, ઘટ વચ્ચે રોજેરોજ સમન્સની બજવણી, દાખલ થયેલા ગુનાઓની તપાસ, નિવેદનો, કૉર્ટની તારીખોમાં હાજરી, રોજેરોજ બનતી ઘટનાઓના ગુના દાખલ કરવા સાથે જૂના કેસોના ડિટેક્શનના ભારણ સહિતની કામગીરી વચ્ચે રોજેરોજ આવી ડ્રાઈવથી પોલીસ સ્ટાફ પરેશાન થઈ ગયો છે. આવી ડ્રાઈવથી ખૂન, બળાત્કાર, ઘરફોડ ચોરી સહિતના ગંભીર ગુનાઓના ગ્રાફમાં કશો ઘટાડો થયો નથી. પોલીસ સ્ટેશનનો અડધો અડધ સ્ટાફ આવી ડ્રાઈવમાં જોતરાઈ જતો હોઈ વાસ્તવિક કામગીરી પર વિપરીત અસર પડી રહી હોવાનું ખુદ સિનિયર પોલીસ ઈન્સ્પેક્ટર્સ અને અન્ય કર્મચારીઓ જણાવી રહ્યાં છે.