વિરોધ પ્રદર્શન બાદ આગેવાન પ્રતિનિધિઓએ ઈન્ચાર્જ એસપી ગૌતમ વિવેકાનંદનને રૂબરૂ મળીને કતલના આરોપમાં પકડાયેલાં દહીંસરાના બેઉ ભાઈ માલધારી હોવાના અને કેબલ ચોર ગેંગે પોલીસ જમાદારના કહેવાથી કાવતરું ઘડીને તેમને ખોટી રીતે ફસાવ્યાં હોવાની રજૂઆત કરી હતી.

ઉલ્લેખનીય છે કે પોલીસ કાર્યવાહીના બે દિવસ બાદ નજીકના વેકરા ગામે વાડીમાં કેબલ ચોરી કરવા ઘૂસેલાં દિનેશ કોલીને લોકોએ રંગેહાથ પકડ્યાં બાદ, હિંદુ મુસ્લિમ સમાજના લોકોની હાજરીમાં પોતે અને અન્ય ત્રણ જણે ભેગાં મળીને કાવતરું રચીને વાછરડું કાપ્યું હોવાનું અને પોલીસને બાતમી આપ્યાં બાદ પોલીસે બેઉ ભાઈને પકડ્યાં હોવાની કબૂલાત કરતો વીડિયો વાયરલ થયાં બાદ પોલીસની કામગીરી પર ઘેરો સંદેહ સર્જાયો છે.

સ્થાનિક સ્વરાજ્યની તોળાતી ચૂંટણીઓ વચ્ચે અચાનક આ વિવાદ ઘેરો બન્યો છે. નેતાઓના ફેંકેલા ટુકડાં પર પોતાની રાજકીય કારકિર્દી બનાવવા નીકળેલાં અને પોતાને ધર્મના ઠેકેદાર માની બેસેલાં છાપેલાં કાટલાં જેવા અમુક તત્વો પણ તેમના રાજકીય રોટલાં શેકવા મેદાને ઉતરતાં શંકા કુશંકા વધુ પ્રબળ બની રહી છે.