ભુજના એરપોર્ટ રોડ પર રુદ્ર રેસિડેન્સીમાં રહેતા જુસબ વલીમામદ કકલ સામે સસ્તાં સોનાના નામે ઠગાઈ સહિત લેન્ડગ્રેબિંગ, પોક્સો, લૂંટ અને હત્યાના પ્રયાસના બે ગુના સહિત આઠ ગુના નોંધાયેલાં છે. પોલીસે જણાવ્યું કે જુસબે પોતાની વાર્ષિક આવક 3 લાખ જણાવી છે.

♦ જુસબની કથિતપણે જમીન દલાલ તરીકેની વાર્ષિક આવક માત્ર 3 લાખની હોવા છતાં 26-02-2014થી આજ દિન સુધીના સમયગાળા દરમિયાન તેણે ગુનાખોરી આચરીને 55 લાખ 28 હજાર 800 રૂપિયાની વધુ મિલકત વસાવી હોવાનું બહાર આવ્યું છે.

♦જુસબના ભાઈ હુસેન સામે પણ ચાર ગુના નોંધાયેલાં છે અને તેણે પોતાની વાર્ષિક આવક 6 લાખની તુલનાએ 67.87 લાખ રૂપિયાની વધુ સ્થાવર અને જંગમ મિલકત ધરાવતો હોવાનું બહાર આવ્યું છે. હુસેન પોતે 36 ગાયો ભેંસો ધરાવે છે અને તેના દૂધના વેચાણમાંથી 6 લાખની આવક થતી હોવાનું જણાવે છે. જો કે, આ 36 ગાયો ભેંસો કઈ આવકમાંથી ખરીદી હતી તે જાહેર નથી થયું.

♦એ જ રીતે, દિલાવર કકલ પણ ભાભીના નામે મકાન સહિત 60 હજારની વધુ મિલકત ધરાવતો હોવાનું સ્પષ્ટ થયું છે.

પોલીસની તપાસમાં સ્પષ્ટ થયું છે કે આરોપીઓ કોઈ ઈન્કમટેક્સ રીટર્ન ભરતાં નથી.

પીઆઈ એસ.એન. ચુડાસમાના સીધા માર્ગદર્શન હેઠળ પીએસઆઈ એચ.આર. જેઠીએ ત્રણે રીઢાં આરોપી બંધુઓ વિરુધ્ધ ભુજ એ ડિવિઝન પોલીસ મથકે ફરિયાદ નોંધાવી છે.

પોલીસ અત્યારસુધી આવી ટોળકીઓ સામે માત્ર ગેંગ એક્ટની કલમો હેઠળ નવો ગુનો નોંધતી હતી. પરંતુ ગુનાઓ આચરીને તેમાંથી આવકની તુલનાએ અપ્રમાણસર મિલકતો વસાવી હોવાની ફરિયાદ પહેલીવાર દાખલ કરતાં રીઢા ચીટરો અને અપરાધીઓમાં ફફડાટ ફેલાઈ ગયો છે.