૧૧ સપ્ટેમ્બર ૨૦૨૪ના રોજ ભુજના સુમરાસર ગામે બાળા ઘર બહાર સાયકલથી રમતી હતી ત્યારે અઝીઝ સુલેમાન શેખ (ઉ.વ. ૩૧, રહે. સુમરાસર શેખ ગામ, ભુજ) મોટર સાયકલ લઈને નીકળ્યો હતો. ‘તું સાયકલની ઘંટડી કેમ વગાડે છે? મારું માથું ફરે છે’ કહીને અઝીઝે બાળાને ગાળો ભાંડી, છાતી પર હાથ ફેરવેલો. બાળાની બૂમાબૂમના પગલે તેની માતા ઘર બહાર દોડી આવી અઝીઝને ઠપકો આપવા માંડી ત્યારે ઉગ્ર થઈને અઝીઝ બાળાના કપડાં ફાડવા માંડેલો. માતા દીકરીને છોડાવવા જતા અઝીઝે માતાને ધક્કો મારીને નીચે પાડી દઈ જાનથી મારી નાખવાની ધમકી આપેલી. બનાવ અંગે માધાપર પોલીસ મથકમાં ભારતીય ન્યાય સંહિતા, પોક્સો અને એટ્રોસીટી એક્ટ તળે ફરિયાદ નોંધાવાઈ હતી.

આ કેસમાં ૧૦-૦૯-૨૦૨૫ના રોજ ભુજની પોક્સો કૉર્ટે અઝીઝને દોષી ઠેરવી પોક્સો એક્ટની કલમ ૮ હેઠળ પાંચ વર્ષની સખ્ત કેદ સાથે દસ હજાર રૂપિયાનો દંડ ફટકાર્યો હતો. એ જ રીતે, ભારતીય ન્યાય સંહિતાની કલમ ૧૧૫ (૨) અને ૩૫૧ (૨) હેઠળ  ૬-૬ માસની સાદી કેદ અને ૧-૧ હજાર રૂપિયા દંડ, એટ્રોસીટી એક્ટની કલમ ૩ (૧) (W) (૧) હેઠળ ૬ માસની સાદી કેદ અને ૫ હજાર રૂપિયા દંડ ફટકાર્યો હતો.

પોક્સો કૉર્ટના ચુકાદા સામે અઝીઝે હાઈકૉર્ટમાં અપીલ કરેલી. અરજદારના વકીલે કૉર્ટમાં રજૂઆત કરેલી કે બનાવ સાંજના સમયે રહેણાક વિસ્તારમાં અનેક લોકોની હાજરીમાં બન્યો હતો પરંતુ ટ્રાયલ કૉર્ટ સમક્ષ કોઈપણ સ્વતંત્ર સાક્ષીની તપાસ કરવામાં આવી નહોતી.

માતાને આઈ વીટનેસ તરીકે રજૂ કરાયેલી પરંતુ ટ્રાયલ દરમિયાન રેકર્ડ પર આવેલું કે બનાવ બન્યા બાદ તે સ્થળ પર પહોંચેલી અને પોતાની દીકરીને અઝીઝ ધક્કો મારતો હોવાનું નજરે જોયેલું. ફરિયાદમાં જણાવાયું છે કે બાળા સાયકલથી રમતી હતી અને તેને થયેલી ઈજાઓ પડી જવાથી થઈ હોવાનો મેડિકલ ઑફિસરે અભિપ્રાય આપેલો.

હાઈકૉર્ટના જસ્ટિસ એસ.વી. પિન્ટોએ અપીલ વિચારણા માગી લે તેવી હોવાનું જણાવી, કેસના ગુણદોષમાં પડ્યાં વગર જ્યાં સુધી અપીલ પર ફેંસલો ના થાય ત્યાં સુધી અરજદારની સજા મોકૂફ રાખી ૨૫ હજારના જાતમુચરકા પર જામીન મુક્ત કરવા હુકમ કર્યો છે. અરજદાર વતી હાઈકૉર્ટમાં એડવોકેટ કવન પટેલે દલીલો કરેલી. ભુજના એડવોકેટ સચિન ઠક્કર સહયોગી બન્યાં હતા.