રાજસ્થાનથી મોટા પાયે ગુજરાતમાં ઈંગ્લિશ દારૂ ઠાલવવાના સંખ્યાબંધ ગુનાઓમાં સંડોવાયેલા રાજસ્થાન અને કચ્છના છ બૂટલેગરો વિરુધ્ધ  SMCએ ગુજસીટોક કાયદા હેઠળ ગુનો નોંધી તેમની ધરપકડ કરી હતી. આ ગુનામાં ચાર્જશીટ દાખલ થયા બાદ તૌફિક નઝીરખાન મુસલમાન (રહે. ચુરુ, રાજસ્થાન), રામા વજા ભરવાડ (રહે. મેઘપર બોરીચી, મૂળ રહે. પલાસવા, રાપર) અને મહેન્દ્ર ઊર્ફે મેંદો જીવણ મકવાણા (કોલી) (રહે. મૂળ ખાનપર, રાપર)એ ભુજની વિશેષ ગુજસીટોક કૉર્ટમાં રેગ્યુલર જામીન મેળવવા અરજી કરેલી. જો કે, તૌફિક સામે ગુજરાતના વિવિધ પોલીસ મથકમાં બૂટલેગીંગના ૬, રામા ભરવાડ સામે ૩૧ અને મેંદા વિરુધ્ધ ૧૯ ગુના દાખલ થયેલા હોવાનું, બધા આરોપીઓ સંગઠિત ટોળકી બનાવીને ગુનો આચરતાં હોવાનું, જામીન મળે તો ફરી એ જ ધંધો કરશે તેવી દલીલોના આધારે સ્પે. એન્ડ સેશન્સ જજ દિલીપ પી. મહિડાએ ત્રણેની અરજી ફગાવી દીધી છે.

SMCએ ગત ૨૨ જૂનના રોજ કેરા ગામે કટિંગ ટાણે રેઈડ પાડીને ૧.૩૮ કરોડના જપ્ત કરેલા ઈંગ્લિશ દારૂના પ્રકરણમાં ઝડપાયેલા કેરાના બૂટલેગર અનોપસિંહ અભેસિંહ રાઠોડની જામીન અરજી ભુજના આઠમા અધિક સેશન્સ તુષાર ખંધડીયાએ ફગાવી દીધી છે. આરોપી ગુનાનો સૂત્રધાર હોવાનું, તેની વિરુધ્ધ ૪૨ ગુના નોંધાયેલા હોવા સહિતની દલીલોના ગ્રાહ્ય રાખીને કૉર્ટે જામીન આપવા ઈન્કાર કર્યો હતો.

એ જ રીતે, લાકડીયા પોલીસે હાઈવે પર આવેલી હોટેલ બળિયા દેવમાંથી જપ્ત કરેલા ૩૨ હજારના ઈંગ્લિશ શરાબના ગુનામાં માલ સપ્લાય કરનારા ગાંધીધામના રીઢા બૂટલેગર દેવેન્દ્ર ઊર્ફે દેવો ખોડીદાસ કાપડીની જામીન અરજી પણ ભચાઉ સેશન્સ કૉર્ટે ફગાવી દીધી છે.