માળિયા મિંયાણા પોલીસ મથકેથી પ્રાપ્ત વિગતો મુજબ ગત રાત્રે પોણા નવના અરસામાં દુર્ઘટના સર્જાઈ હતી. GJ-12 BX-8482 નંબરની કન્ટેઈનર ટ્રક કચ્છથી પૂરપાટ મોરબી તરફ જતી હતી ત્યારે ડ્રાઈવરે અચાનક સ્ટિયરીંગ પરનો કાબૂ ગુમાવતાં ટ્રક ડિવાઈડર કૂદીને સામેની લેનમાં મોરબીથી કચ્છ તરફ જઈ રહેલી RJ-07 GD-0612 નંબરની ટ્રક સાથે ટકરાઈ ગઈ હતી. એક્સિડેન્ટથી બચવા રાજસ્થાન પાસિંગની ટ્રકના ચાલકે કાવો મારીને ટ્રકને સાઈડમાં લેવા નિષ્ફળ પ્રયાસ કર્યો હતો. રાજસ્થાનની ટ્રકની પાછળ રહેલી અર્ટિગા કાર પણ ટ્રક સાથે ટકરાઈ ગઈ હતી.

ચાંદ્રોડાના શાંતિલાલ વેલજીભાઈ આહીર તેમની અર્ટિગા કાર લઈને જૂનાગઢ બાજુ ગયેલા અને પાછાં ફરતાં જૂનાગઢની પી.એમ. ચાવડા હાઈસ્કુલમાં ધોરણ નવમાં ભણતાં મીઠીરોહરના રુદ્ર ગોપાલભાઈ હદાભાઈ ગુજરીયા (આહીર), જૈમિન જગદીશભાઈ બાબરીયા, ક્રિષ્ના રમેશભાઈ જરુ, શિવમ્ નારણભાઈ બકુત્રા, ક્રિષ્ના ગોપાલભાઈ જરુ, મીત રમેશભાઈ બાબરીયા, વિષ્ણુ દેવરાજભાઈ ડાંગર એમ સાત છોકરાઓને લઈ કચ્છ પરત ફરતાં હતા.

દુર્ઘટનામાં રુદ્ર ગોપાલભાઈ ગુજરીયા અને જૈમિન જગદીશભાઈ બાબરીયા (બંનેની ઉ.વ. ૧૫, રહે. મીઠીરોહર, ગાંધીધામ)ના કારમાં ફસાઈને ભીષણ આગમાં ગંભીર રીતે બળી જવાથી મૃત્યુ નીપજ્યાં હતા. બંને બાળકો એટલી હદે બળી ગયાં હતા કે તેમના મૃતદેહની ઓળખ કરવી પણ અઘરી થઈ ગઈ હતી. દુર્ઘટનામાં કારના ચાલક શાંતિલાલ અને અન્ય બાળકોને નાની મોટી ઈજાઓ પહોંચી હતી. તેમને સામખિયાળીની ખાનગી હોસ્પિટલમાં દાખલ કરાયાં હતા.

અકસ્માત એટલો ભયંકર હતો કે ટ્રકના ડ્રાઈવર અને ક્લિનરને બચવા માટે તક મળી નહોતી. ટ્રકના ડ્રાઈવર શિવરામ મંગલારામ નાઈ અને ક્લિનર કિશન રામલાલ નાયક (બંને રહે. બિકાનેર, રાજસ્થાન) બેઉના ભુંજાઈ ગયેલા મૃતદેહ મળ્યા હતા. એકનો ભડથું થઈ ગયેલો મૃતદેહ ટ્રકના દરવાજા પાસે લટકતી હાલતમાં મળ્યો હતો.

માળિયાના પીઆઈ ડી.કે. દરબારે કચ્છખબરને જણાવ્યું કે અર્ટિગા કાર સીએનજી સંચાલિત હતી પરંતુ આગ રાજસ્થાન પાસિંગની ટ્રકમાંથી લીકેજ થયેલા ડીઝલના લીધે ફાટી નીકળી હોવાનું જણાઈ રહ્યું છે. ટ્રક લોખંડની રેલિંગ સાથે ઘસડાતાં તણખાં ઝરતાં ડીઝલે આગ પકડી લીધી હશે અને પળ બે પળમાં જ વાહનો ભીષણ આગની જ્વાળામાં લપેટાઈ ગયાં હશે. દુર્ઘટનાના પગલે મોરબી અને ભચાઉથી ફાયર બ્રિગેડની ટીમો દોડી ગઈ હતી અને મોડી રાત્રે આગ બૂઝાવી હતી.