દાદા પૌત્રી બેઉ એક્ટિવા પર ઘર તરફ જતા હતા ત્યારે રસ્તામાં વેગનઆર કારથી જઈ રહેલા આદિલ ગુલામ હજામ (ખલીફા)એ કારથી એક્ટિવાનો પીછો કરી, ગાડી નજીક લાવી, મોટેથી હોર્ન વગાડી, આંખો અને હાથ વડે કિશોરીને બીભત્સ ઈશારા કરેલાં. આદિલની હરકતો જોઈને દાદાએ એક્ટિવા ઊભી રાખીને આદિલને ઠપકો આપેલો.

ઘરે આવ્યા બાદ બનાવ અંગે દીકરીએ માતાને વાત કરતા માતા દીકરીને લઈ આદિલના પિતા ગુલામ પાસે રજૂઆત કરવા ગયેલી.

ગુલામે પુત્રનો પક્ષ લઈ મા દીકરી જોડે ઉશ્કેરાઈને ઝઘડો કરેલો. ગુલામે બેઉને ગાળો ભાંડેલી અને કિશોરીના જાકીટનો ગળાનો ભાગ પકડીને ધક્કાધક્કી કરેલી. દીકરીને છોડાવવા માટે મા વચ્ચે પડતાં ગુલામે માતાને થપ્પડ મારી ધક્કો મારેલો. બનાવ અંગે દીકરીના પિતાએ કોડાય પોલીસ મથકે ભારતીય ન્યાય સંહિતાની કલમ ૭૮, ૧૧૫, ૩૫૨ અને ૫૪ તથા પોક્સો એક્ટની કલમ ૧૧ અને ૧૨ હેઠળ ફરિયાદ નોંધાવી હતી.

આ કેસમાં ૫ દસ્તાવેજી પુરાવા અને ૧૧ સાક્ષી તપાસીને પોક્સો કૉર્ટના ખાસ જજ જે.એ. ઠક્કરે પિતા પુત્રને દોષી ઠેરવી કલમ ૭૮ હેઠળ ૧ વર્ષની સખ્ત કેદ સાથે દસ હજાર રૂપિયાનો દંડ ફટકાર્યો છે. કલમ ૧૧૫ હેઠળ ત્રણ માસની સાદી કેદ અને પાંચસો રૂપિયા દંડ, કલમ ૩૫૨ હેઠળ છ માસની સાદી કેદ અને એક હજાર દંડ તથા પોક્સો એક્ટની કલમ ૧૨ હેઠળ ૧ વર્ષની સખ્ત કેદ સાથે દસ હજાર રૂપિયાનો દંડ ફટકાર્યો છે.

આ કેસમાં સરકાર તરફે જિલ્લાના મુખ્ય સરકારી વકીલ એચ.બી. જાડેજાએ હાજર રહી સાક્ષીઓ તપાસીને દલીલો કરી હતી.