આજે સવારે પૂરાં થતા ૨૪ કલાક દરમિયાન (શનિવારે સવારે ૬થી આજે સવારે ૬ વાગ્યા દરમિયાન) રાપરમાં ૫૮ મિ.મી., ભચાઉમાં ૯૦ મિ.મી, અંજારમાં ૧૭ મિ.મી., ભુજમાં ૧૬ મિ.મી. અને ગાંધીધામમાં ૨૭ મિ.મી. વરસાદ નોંધાયો હતો.

રાપરને બાદ કરતાં અન્ય તાલુકા અંજાર, ગાંધીધામ, ભુજ અને નખત્રાણામાં સરેરાશ એક ઈંચ વરસાદ વરસ્યો છે. અબડાસા, લખપત અને મુંદરામાં ઝરમર ઝાપટાં વરસ્યા છે.

ડીપ ડીપ્રેશન કચ્છ પાકિસ્તાન તરફ આગળ ધપી રહ્યું છે. તે જોતા હવામાન વિભાગે સોમવારે કચ્છ, બનાસકાંઠા, પાટણ, મહેસાણા જિલ્લા માટે રેડ એલર્ટ જારી કર્યું છે. આ જિલ્લાઓમાં વેગીલા વાયરા અને ગાજવીજ સાથે અતિ ભારેથી અત્યાધિક ભારે વર્ષાની આગાહી છે. મંગળવારે ઓરેન્જ એલર્ટ જારી કરાયું છે. રાજ્યના અન્ય જિલ્લાઓમાં પણ મધ્યમથી ભારે વરસાદની આગાહી જારી કરાઈ છે. શાળાઓના આચાર્યોને વરસાદની પરિસ્થિતિમાં વિવેકબુધ્ધિ મુજબ શિક્ષણ કાર્ય ચાલુ રાખવું કે નહીં તેનો નિર્ણય કરી લેવા જિલ્લા શિક્ષણાધિકારીએ સૂચના આપી છે. જો કે, અનેક ખાનગી સ્કુલોએ આજે જ આવતીકાલ માટે શાળાઓમાં રજા જાહેર કરી દીધી છે.