હુંબલે જણાવ્યું કે આ ગુંડાઓની યાદી મીડિયા અને સોશિયલ મીડિયા પર જાહેર કરવી જોઈએ જેથી કચ્છની જનતાને ખોટા ધંધા કરતાં લોકોની જાણકારી મળે. પોલીસ ફક્ત ‘સિલેક્ટેડ’ ગુંડાઓની યાદી બનાવશે તેવી આશંકા દર્શાવીને હુંબલે જણાવ્યું છે કે જો આ યાદી જાહેર કરાય તો જેમના નામ યાદીમાં ના હોય તેવા અસામાજિક તત્વોના નામ જનતા પણ પોલીસને આપીને મદદરૂપ બની શકશે.

કચ્છમાં મોટી સંખ્યામાં લિસ્ટેડ બૂટલેગરો પોલીસ રેકર્ડ પર છે ત્યારે આવા બૂટલેગરોની યાદી જાહેર કરવામાં પોલીસને શો વાંધો હોય? ખરેખર તો કચ્છમાં ખનિજ માફિયાઓ બેફામ બન્યાં છે, જેમના ઉપર મોટી રકમના દંડ થયેલાં છે. આવા અનેક ખનિજ માફિયા ભાજપ સાથે સીધી રીતે સંકળાયેલાં છે અથવા ભાજપ આવા ગુનેગારોને છાવરે છે તેવો દાવો કરીને હુંબલે માત્ર દેખાડા ખાતર આ કાર્યવાહી થઈ રહી હોવાનું જણાવ્યું છે.

પોલીસ ખાતામાં ચાલતાં ભયંકર ભ્રષ્ટાચાર અંગે નિર્દેશ આપતાં હુંબલે જણાવ્યું કે કચ્છમાં સ્ટેટ મોનિટરીંગ સેલ દ્વારા અવારનવાર દરોડા પાડવામાં આવે છે પરંતુ દરોડા બાદ સંબંધિત પોલીસ સ્ટેશનના જવાબદાર પોલીસ અધિકારીઓનો વાળ પણ વાંકો થતો નથી. બૂટલેગરો પાસેથી ઉચ્ચ પોલીસ અધિકારીઓ સુધી દર મહિને હપ્તા પહોંચતા હોવાનો પણ તેમણે આરોપ કર્યો છે.