અંદાજે સાડા ચાર એકરના વિશાળ મેદાનમાં ભક્તિમય વાતાવરણ સર્જવા માટે પ્રવેશદ્વાર પર જ મા આશાપુરાનું મંદિર બનાવાયું છે. તો, દુર્ગા માતાના નવ સ્વરુપ સાથેના નવ મંદિરો આદ્યાત્મિક આકર્ષણરૂપ બની રહેશે.

મૂળ કચ્છી એવા બોલિવુડની પ્રખ્યાત હનીફ અસલમની બેલડીના તાલે ઈન્ડિયન આઈડોલ ફિનાલેના ગાયકો ખેલૈયાઓની રેડ કાર્પેટ પર ગરબે ઘૂમવાની હોંશ વધારશે. સુરક્ષા માટે ઠેર ઠેર ૪૦ બાઉન્સર્સ તૈનાત હશે. વીઆઈપી પાર્કિંગ, મલ્ટિ ક્વીઝીન ફૂડ સ્ટોલની સુવિધા સાથે રોજેરોજ ૨૦ ખેલૈયાઓને પુરસ્કાર આપીને હોંશ વધારવામાં આવશે.

પહેલીવાર મોટાપાયે આયોજીત થનારી આ નવરાત્રિને લઈને કચ્છના ખેલૈયાઓમાં ભારે ઉત્સુક્તા પ્રવર્તી રહી છે. બીજી તરફ, આદ્યશક્તિની આરાધનાના આ પર્વના થઈ રહેલા વ્યાવસાયીકરણનો મુદ્દો પણ ચર્ચાની એરણે ચઢ્યો છે. વિશ્વ હિંદુ પરિષદના પૂર્વ હોદ્દેદાર વૈભવ સંઘવી તેમનો મત દર્શાવતા કહે છે કે ‘મોટાભાગના ધાર્મિક પર્વો કે જેમાં મોટી સંખ્યામાં લોકો જોડાતાં હોય છે તેનું વ્યાવસાયીકરણ થઈ ગયેલું છે. કચ્છમાં પણ અનેક સ્થળે કૉમર્સિયલ નવરાત્રિ મહોત્સવ યોજાઈ રહ્યા છે ત્યારે કોઈ ચોક્કસ આયોજનને લઈને થઈ રહેલી ચર્ચાઓ નિરર્થક છે. બાકી, કચ્છની કોમી એકતા બેમિસાલ છે. આજે પણ માતાના મઢમાં મુસ્લિમ લંગા નોબત વગાડે છે અને નવરાત્રિમાં વપરાતાં ગરબા અને કોડિયાં પણ મોટાભાગના મુસ્લિમ કુંભારો જ તૈયાર કરે છે’