૨૪ ઑગસ્ટની સવારે રસિકલાલને અજાણ્યા નંબર પરથી ફોન આવેલો. ફોન કરનારે પોતાની ઓળખ પોલીસ ઈન્સ્પેક્ટર રણજીતકુમાર તરીકે આપીને જણાવેલું કે ‘જમ્મુ કાશ્મિરના પહેલગામમાં થયેલા આતંકવાદી હુમલામાં તમારો મોબાઈલ નંબર અને આધાર કાર્ડ પકડાયા છે, આતંકવાદીઓ જોડે તમારું કનેક્શન હોવાની માહિતી મળી છે. તમારો કેસ પુના ટ્રાન્સફર કરીએ છીએ, પુના એટીએસ ખાતે તમારે હાજર થવાનું છે’ આતંકવાદી હુમલામાં પોતાની સંડોવણીની વાત સાંભળીને જ રસિકલાલના મોતિયા મરી ગયા હતા.

થોડીવાર બાદ પુના એટીએસના નામે તેમને અજાણ્યા નંબર પરથી ફોન આવેલો અને તાત્કાલિક હાજર થવા કહેલું. ફરિયાદીએ આનાકાની કરતા તમારો કેસ અમે દિલ્હી ટ્રાન્સફર કરીએ છીએ તેમ કહેવાયેલું. ત્યારબાદ પ્રેમકુમાર નામના શખ્સે તેમને ફોન કરીને તમારા બેન્ક ખાતામાં ૭૫ લાખ જમા થયા હોવાની માહિતી મળી છે કહીને તપાસના બહાને બેન્ક ખાતા વિશે માહિતી માગેલી.

ત્યારબાદ તેમને કેટલાંક લોકોના ફોટોગ્રાફ મોકલાયેલાં અને આમાંથી કોને કોને ઓળખો છો તેવી પૂછપરછ કરેલી. અમે ૧૨૧ લોકોને અરેસ્ટ કર્યા છે તેમ જણાવી ગઠિયાઓએ તમારી લિન્ક એમપી યુપીથી અમને મળે છે તેવો દમ મારીને ડરાવ્યા હતા.

બીજા દિવસે સાયબર માફિયાઓએ તેમને બેન્કમાં મોકલીને ખાતામાં રહેલી રકમ ટ્રાન્સફર કરવા જણાવેલું. રસિકલાલે તેમના ખાતામાં રહેલા ૪.૯૭ લાખ રૂપિયા સાવલિયા કિરાના મંદસૌર, મધ્યપ્રદેશ નામના બેન્ક ખાતામાં ટ્રાન્સફર કરાવ્યા હતા.

૨૬ ઑગસ્ટના ત્રીજા દિવસે ગઠિયાઓએ તેમના પીપીએફ એકાઉન્ટમાં રહેલા ૧૨.૪૭ લાખ રૂપિયા યસ બેન્કના ખાતામાં ટ્રાન્સફર કરાવી લીધા હતા.

૨૮ ઑગસ્ટના રોજ સાયબર ગઠિયાઓએ રસિકલાલને તેમની પાસે રહેલા બધા શેર વેચીને રૂપિયા જમા કરાવી દેવા અને નુકસાન થશે તો ડિપાર્ટમેન્ટ રીકવર કરી આપશે તેમ કહીને તેના નાણાં પણ જમા કરાવવા કહેલું. જેથી રસિકલાલે તેમના ભત્રીજા કૌશિક શાહને આ અંગે વાત કરતા કૌશિકે તેમની જોડે સાયબર ફ્રોડ થયું હોવાનું સમજાવીને સાયબર પોલીસ મથકે લઈ આવ્યો હતો.