માધાપર નવાવાસના શ્રીકૃષ્ણનગરમાં રહેતા સોનલબેન સાગરભાઈ પિત્રોડાએ આજે સવારે માધાપર પોલીસ મથકે આવી અજાણી મહિલા તેમનું ૧.૯૦ લાખ રૂપિયાના મૂલ્યનું પોણા બે તોલાનું મંગળસૂત્ર અને ૭૦૦ રોકડાં રૂપિયા લઈ જતી રહી હોવાની ફરિયાદ નોંધાવી હતી.

ઘરમાં બધા દુઃખી છો, કોઈકે મેલી વિદ્યા કરી છે, નડતર દૂર કરવું પડશે, વિધિ કરવી પડશે તેવું કહીને દંપતીને વિશ્વાસમાં લઈ વિધિ કરવાના બહાને આ ઠગ મહિલાએ મંગળસૂત્ર અને રૂપિયા મેળવી એક રૂમાલમાં બાંધી લીધા હતા.

ગુના નોંધાયા બાદ પોલીસે તુરંત અજાણી મહિલાની શોધખોળ કરતાં વર્ણનવાળી મહિલા માધાપર જૂનાવાસ સોનાપુરી ગેટ પાસેથી મળી આવી હતી. પોલીસે તેને પકડીને જડતી લેતાં સોનલબેન પાસેથી છળકપટથી મેળવેલું મંગળસૂત્ર અને રોકડાં ૧૬૪૦ રૂપિયા મળી આવ્યા છે.

પોલીસની પૂછપરછમાં પશ્ચિમ કચ્છમાં ગૃહિણીઓ જોડે આ રીતે થયેલી ઠગાઈના અન્ય છ ગુનાનો ભેદ ઉકેલાયો છે.

♦૦૩-૦૪-૨૦૨૫ના રોજ માનકૂવા પોલીસ મથકે મેઘપરના હસ્મિતાબેન ભંડેરીએ આ મહિલા પોતાને ભોળવીને ૭૪ હજારના મૂલ્યનું ૪ તોલા મંગળસૂત્ર અને ૬૮ હજારની કિંમતના સોનાના પાટલાં મળી ૧.૪૧ લાખના દરદાગીના મેળવી ઠગાઈ કરી ગઈ હોવાની ફરિયાદ નોંધાવેલી

♦૦૬-૦૭-૨૦૨૪ના રોજ માધાપર પોલીસ સ્ટેશનમાં માધાપરના ઐશ્વર્યાનગરમાં રહેતા વનિતાબેન ગોરસિયાને ભોળવીને આ ઠગ મહિલા ૬૦ હજારનું મંગળસૂત્ર તથા ૭૦ હજારની સોનાની પોંચી મેળવીને ફરાર થઈ ગઈ હોવાની ફરિયાદ નોંધાયેલી

♦૦૩-૦૭-૨૦૨૩ના રોજ ભુજ એ ડિવિઝનમાં વાલરામનગર-૨માં રહેતા નીનાબેન ચૌહાણે આ મહિલા  ૫૦ હજારની કિંમતના મંગળસૂત્ર અને ૬ હજારની બુટ્ટીની ઠગાઈ કરી ગઈ હોવાની ફરિયાદ નોંધાવેલી

♦૧૬-૦૯-૨૦૨૩ના રોજ ભુજ એ ડિવિઝનમાં હિંગલાજવાડીના ઉદય એપાર્ટમેન્ટમાં રહેતા હેમલતાબેન ધોળુએ આ મહિલા ૭૫ હજારનું મંગળસૂત્ર, ૬ હજારની બુટ્ટી અને ૩૬૦૦ રોકડાં રૂપિયા સહિત ૮૪,૬૦૦ રૂપિયાની માલ મિલકત લઈ ગઈ હોવાની ફરિયાદ નોંધાવેલી

♦૧૧-૧૧-૨૦૨૨ના રોજ ભુજ એ ડિવિઝનમાં ગાંધીધાના ગળપાદરના દમયંતિબેન ગોસ્વામીએ આ મહિલાએ વિધવા સહાયમાં વધુ નાણાં અપાવવાના બહાને વિશ્વાસમાં લઈને ભુજમાં હમીરસર કાંઠા બાજુ દવાખાનામાં ચેક અપ કરાવી પ્રમાણપત્ર મેળવવાના બહાને લઈ જઈ ૧૨ હજારની બુટ્ટી અને ૧ હજાર રોકડાં રૂપિયા લઈ ફરાર થઈ ગઈ હોવાની ફરિયાદ નોંધાવી હતી