યુવરાજ અને તેના સાગરીતો મેહુલસિંહ ચંદુભા ઝાલા, રામદેવસિંહ ચંદુભા ઝાલા (બંને રહે. માંડવી) દિવ્યરાજસિંહ સુરુભા જાડેજા અને પારસગર મયૂરગર ગોસ્વામીએ માલ મગાવ્યો હોવાની બાતમીના આધારે LCBએ આ સફળ દરોડો પાડ્યો હતો અને પાંચે સામે માંડવી મરિન પોલીસ મથકે ગુનો નોંધાવ્યો છે. દરોડા સમયે એકેય બૂટલેગર સ્થળ પર હાજર મળ્યો નહોતો. યુવરાજ સામે અગાઉ પણ કરોડોના દારૂ સંગ્રહ, વેચાણના ૪૨ ગુના નોંધાયેલાં છે. મેહુલ ઝાલા, તેના ભાઈ રામદેવ ઝાલા અને દિવ્યરાજ જાડેજા સામે પણ પ્રોહિબિશન તળે પાંચથી આઠ ગુના નોંધાયેલાં છે.

LCBએ ત્રગડી ગામે અન્ય એક બૂટલગેર યુવરાજસિંહ ઊર્ફે ટીટી મનુભા જાડેજાના રહેણાક પાસે બનાવેલા ગુપ્ત રૂમમાં દરોડો પાડીને ૧.૫૮ લાખનો દારૂ અને બિયરનો જથ્થો જપ્ત કર્યો છે. જો કે, આરોપી હાજર મળ્યો નહોતો. LCB પીઆઈ એ.એમ. મકવાણા, પીએસઆઈ જે.બી. જાદવ અને એમ.એચ. શિણોલ સહિતનો સ્ટાફ બંને દરોડામાં જોડાયો હતો. 

યુવરાજની જેમ અનોપ પણ સક્રિય થઈ ગયો છે. જો કે, ‘અગમ્ય કારણોસર’ અનોપના અડ્ડાઓ સામે ‘ખાખી’ આંખ આડા કાન કરી રહી હોઈ ‘ખાખી’ની કાર્યવાહીની દાનત પર શંકા ઉત્પન્ન થઈ રહી છે. ભુજમાં મહાદેવ નાકા આસપાસ અનોપ પાસેથી માલ ખરીદીને રાજદીપ છૂટથી વેચાણ કરી રહ્યો છે. તો, માધાપરના કારીમોરી બાગમાં કાનો પણ અનોપના માલનું છૂટથી વેચાણ કરી રહ્યો છે. લાકડીયામાં પડેલા દરોડામાં પણ અનોપનું નામ ના ખૂલે તે માટે ત્રણેક પેટીનો તગડો વહેવાર થઈ ગયો હોવાનું ચર્ચાઈ રહ્યું છે. બેફામ અનોપે મોટો જથ્થો ઉતારી લીધો હોવાનું ચર્ચાય છે.