મરણ જનાર ૭૫ વર્ષિય લધાભાઈ ખીમજી સંઘાર પાનના ગલ્લે બાંકડા પર બેઠાં હતા ત્યારે પૂર્વઆયોજીત કાવતરું રચીને દીકરીની માતા રાજબાઈ વીરમ સાકરીયા (સંઘાર), રાજબાઈની ૭૦ વર્ષિય સાસુ રાણબાઈ ઊર્ફે જાનબાઈ બુધિયા સંઘાર અને રાણબાઈની ૭૫ વર્ષિય મોટી બહેન સોનબાઈ ગાભાભાઈ સંઘારે એકસંપ થઈ, કારમાંથી ધોકો સાથે લઈને લધાભાઈ પર હુમલો કર્યો હતો. હુમલામાં લધાભાઈને હાથ અને પગે ફ્રેક્ચર તથા માથામાં હેમરેજ જેવી ગંભીર ઈજા થયેલી અને ૨૯ માર્ચે સારવાર દરમિયાન તેમનું મૃત્યુ નીપજેલું.

આ ગુનામાં ચાર્જશીટ દાખલ થયા બાદ આરોપી રાણબાઈ અને સોનબાઈએ ભુજ સેશન્સ કૉર્ટમાં નિયમિત જામીન અરજી દાખલ કરેલી. તેમના વકીલે જામીન મંજૂર કરવા રજૂઆત કરેલી કે બંને મહિલાઓ વૃધ્ધ અને બિમાર છે. લધાભાઈનું મૃત્યુ ઈજાથી નહીં પરંતુ યોગ્ય સારવાર નહીં મળવાના કારણે થયેલું.

સામા પક્ષે, સરકારી વકીલ દિનેશ જે. ઠક્કર અને સિનિયર એડવોકેટ આર.એસ. ગઢવીએ દલીલ કરી હતી કે આરોપીઓની ગુનામાં સક્રિય અને પ્રથમદર્શનીય સંડોવણી છે. ફરિયાદી અને આરોપીઓ બેઉ એક જ ગામના છે તેથી જામીન પર મુક્ત કરાય તો આરોપીઓ ફરિયાદ પક્ષના સાક્ષીઓ, પુરાવા સાથે ધાક ધમકી કે ચેડાં કરી શકે તેમ છે. કૉર્ટ અગાઉ તેમની જામીન અરજી ફગાવી ચૂકેલી છે ત્યારે ચાર્જશીટ દાખલ થવા માત્રથી કેસના સંજોગોમાં ફેરફાર ગણી શકાય નહીં.

છઠ્ઠા અધિક સેશન્સ જજ વી.એ. બુધ્ધાએ બંને વૃધ્ધ મહિલાની જામીન અરજી ફગાવતાં જણાવ્યું કે ગુનાને લગતાં સીસીટીવી ફૂટેજ જોતાં ગુનામાં તેમની સક્રિય અને પ્રથમદર્શનીય સંડોવણી વર્તાઈ આવે છે.

મૃતકને હેમરેજ સહિતની ગંભીર ઈજાઓ થયેલી. પુરાવો નોંધવાની પ્રક્રિયા હજુ શરુ નથી થઈ અને બેઉ પક્ષ એક જ ગામના હોઈ પુરાવા સાક્ષીઓ સાથે ચેડાં થવાની શક્યતા છે. ચાર્જશીટ દાખલ થવા માત્રથી સંજોગોમાં પરિવર્તન આવ્યું ગણાય નહીં. કેસમાં કોસ્મેટિક કે પેરીફેરલ ચેન્જ નહીં પરંતુ નોંધપાત્ર પરિવર્તન હોવું જોઈએ. ઉલ્લેખનીય છે કે અગાઉ બંને આરોપી મહિલાઓએ હાઈકૉર્ટમાં જામીન અરજી દાખલ કરેલી જે પાછળથી તેમણે પરત ખેંચી લીધી હતી.