વર્ષ ૧૯૬૫માં તત્કાલિન રાજ્ય સરકારે ભારાસર વાંઢ સીમમાં અનુસૂચિત જાતિના પાંચ પરિવારોને સાંથણીમાં જૂના સર્વે નંબર ૬૪, ૯૭ અને ૯૦ (નવા સર્વે નંબર ૩૩/૧ પૈકી) પૈકીની ખેતીની જમીન ફાળવી હતી. પરંતુ, આ પરિવારોએ જમીનનો કબજો મેળવ્યો નહોતો. ત્યારબાદ થયેલા પ્રમોલ્ગેશન સમયે આ જમીનો શ્રીસરકાર થઈ ગયેલી.

અચાનક ૨૦૦૮માં જેમને અગાઉ જમીનો ફાળવાયેલી તેમાંના અમુક જમીન માલિક કે મૃતક માલિકોના વારસદારોએ રાજેશ ભાણજીભાઈ ભાનુશાલી (રહે. મૂળ જંગડીયા, અબડાસા હાલ રહે. મુંબઈ) અને નરહરદાન ઝવેરદાન ગઢવી (રહે. માનકૂવા મૂળ રહે. જનાણ, ખડીર)ને જમીન અંગે પાવર ઑફ એટર્ની લખી આપેલી. તેના આધારે રાજેશ ભાનુશાલી અને નરહરદાને કલેક્ટરને જમીનો તેમના ખાતે કરવા અરજીઓ કરેલી.

મહેસુલ વિભાગે તત્કાલિન સર્કલ ઑફિસર હરસુખભાઈ સીદાભાઈ હુંબલ (રહે. હાલ ગામ દગડ, તાલુકો માણાવદર, જૂનાગઢ)ને સ્થળ પંચનામું કરી અહેવાલ આપવા સૂચના આપેલી. સર્કલ ઑફિસરે વિવાદગ્રસ્ત જમીનો અરજદારોના કબજામાં હોવાના પંચનામા, સોગંદનામા, નકશા, કબૂલાતનામા અને હકારાત્મક અભિપ્રાય તૈયાર કરીને રજૂ કરેલાં. જો કે, કલેક્ટરે અરજીઓ ફગાવી દીધેલી.

કલેક્ટરના હુકમ સામે અરજદારોએ ભુજની સિવિલ કૉર્ટમાં દાવો દાખલ કરેલો.સિવિલ કૉર્ટે સર્કલ ઑફિસરના દસ્તાવેજોના આધારે જમીનો વાદીઓના નામે કરવા હુકમ કરેલો. જેની સામે મહેસુલ વિભાગે જિલ્લા અદાલતમાં અપીલ કરેલી. અપીલ નામંજૂર થતા મામલો હાઈકૉર્ટ પહોંચેલો અને હાલ હાઈકૉર્ટમાં પેન્ડિંગ છે.

મહેસુલ વિભાગની તપાસમાં સર્કલ ઑફિસર હુંબલે અરજદારો સાથે મિલિભગત કરીને, કાવતરું ઘડીને ખોટાં દસ્તાવેજો બનાવ્યાં હોવાનું અને તેના આધારે સિવિલ કૉર્ટે અરજદારોના ખાતે જમીન નોંધવા હુકમ કર્યો હોવાનું ધ્યાને આવતા તત્કાલિન મદદનીશ કલેક્ટર આનંદ પટેલે ૨૮-૦૩-૨૦૧૩ના રોજ ભુજ તાલુકા પોલીસ મથકે સર્કલ ઑફિસર હુંબલ સહિત ૩૬ લોકો સામે ઈપીકો કલમ ૧૯૧, ૧૯૨, ૧૯૩, ૪૧૫, ૪૧૬, ૪૧૮, ૪૧૯, ૪૨૦, ૪૬૩, ૪૬૫, ૪૬૬, ૪૬૭ અને ૪૬૮ હેઠળ જુદી જુદી પાંચ ફોજદારી ફરિયાદો નોંધાવી હતી.

આ ગુનામાં અમુક આરોપીઓને સેશન્સ કૉર્ટે તો અમુકને હાઈકૉર્ટે આગોતરા જામીન આપેલાં. દરમિયાન, આરોપીઓએ સિવિલ કૉર્ટના હુકમના આધારે દિવાની મામલાને ફોજદારી રુપ આપીને ખોટી રીતે ફીટ કરાયાં હોવાના આધાર પર હાઈકૉર્ટમાં ફરિયાદ રદ્દ કરાવવા અરજી કરેલી.

એક સરકારી કર્મચારી તરીકે હુંબલે કરેલો ગુનો ગંભીર હોવા સહિતના વિવિધ મુદ્દે સરકારી વકીલ ડી.જે. ઠક્કરે કરેલી દલીલને ધ્યાને રાખીને સેશન્સ જજ દિલીપ પી. મહિડાએ હુંબલની પાંચે આગોતરા જામીન અરજીઓ રીજેક્ટ કરી દીધી છે. હાલ આ કેસની તપાસ માનકૂવા પોલીસ કરી રહી છે.