|
કચ્છખબરડૉટકોમ, ભુજઃ लाइफ में तीन चीज़ों को कभी अंडरएस्टीमेट नहीं करना चाहिए, लव सेक्स और धोखा એક જાણીતી હિન્દી ફિલ્મનો આ ડાયલૉગ ભુજની એક કોડભરી યુવતી જાણતી નહોતી. પરંતુ, આ ડાયલોગ પાછળ રહેલો મર્મ આજે આ યુવતી સુપેરે સમજી ગઈ છે. દગાખોર પ્રેમીની હરકતના લીધે તેને આબરુ અને નોકરી ખોવાનો વારો આવ્યો છે. ભુજની ૨૩ વર્ષિય યુવતી સ્નેચપેટ મારફતે અબડાસાના વાડાપધ્ધર ગામના વિશ્વરાજસિંહ જયેન્દ્રસિંહ જાડેજા નામના પરિણીત યુવકના પરિચયમાં આવેલી. પરિચય પ્રેમમાં પરિણમેલો. બેઉ જણે સહમતિથી એકમેકનો સહવાસ કરેલો. આ સમયે આરોપીએ તેના મોબાઈલ ફોનમાં અંગત પળોના વીડિયો રેકોર્ડ કરી લીધેલાં. આરોપી જોડે લગ્ન શક્ય નહોતા.
ધીમે ધીમે સંબંધમાં ઓટ આવવા માંડેલી અને સારા ઘરના માંગા આવવા માંડતા યુવતીએ પણ પરણીને ઠરીઠામ થવાનો નિર્ણય કરીને યુવક સાથેનો સંબંધ મર્યાદિત કરી દીધો હતો.
વિશ્વરાજને આ મંજૂર નહોતું. તેણે સંબંધ ચાલુ રાખવા યુવતી પર ધાક ધમકી કરી દબાણ કરવાનું શરૂ કરી દીધેલું.
યુવતી તેના દબાણને વશ ના થતાં વિશ્વરાજે મોબાઈલ ફોનમાં રેકોર્ડ કરેલી અંગત પળોના વીડિયો યુવતીના પરિચિતો અને નોકરીના સ્થળે કામ કરતાં અન્ય લોકોને શેર કરી દીધેલાં. યુવતીનું જ્યાંથી માંગુ આવેલું તે લોકોએ પણ વાયરલ વીડિયો જોઈને મોંઢું ફેરવી દીધેલું.
અશ્લીલ વીડિયો વાયરલ થવાના લીધે યુવતીને ખાનગી નોકરી ગુમાવવાનો વારો આવ્યો. અંતે તેણે હિંમતપૂર્વક વિશ્વરાજ વિરુધ્ધ ભુજના સાયબર ક્રાઈમ પોલીસ મથકે ફરિયાદ નોંધાવી છે. પોલીસે IT Actની કલમ ૬૬ ઈ, ૬૭, ૬૭ એ અને BNSની કલમ ૭૭, ૩૫૧, ૭૫ (૩) હેઠળ ગુનો નોંધીને આરોપીની ધરપકડ કરી લીધી છે.
Share it on
|
Latest
3956 views
