હુમલા અને હત્યાનો બનાવ ગત ૨૭ માર્ચની સાંજે માંડવીના બિદડા ગામે જૂના બસ સ્ટેશન ચાર રસ્તાએ બન્યો હતો. મરણ જનાર ૭૫ વર્ષિય લધાભાઈ ખીમજી સંઘાર પાનના ગલ્લે બાંકડા પર બેઠાં હતા ત્યારે પૂર્વઆયોજીત કાવતરું રચીને દીકરીની માતા રાજબાઈ વીરમ સાકરીયા (સંઘાર), રાજબાઈની ૭૦ વર્ષિય સાસુ રાણબાઈ ઊર્ફે જાનબાઈ બુધિયા સંઘાર અને રાણબાઈની ૭૫ વર્ષિય મોટી બહેન સોનબાઈ ગાભાભાઈ સંઘારે એકસંપ થઈ, કારમાંથી ધોકા લઈ આવીને ૭૫ વર્ષિય લધાભાઈ પર હુમલો કર્યો હતો. હુમલામાં લધાભાઈને હાથ અને પગે ફ્રેક્ચર તથા માથામાં હેમરેજ જેવી ગંભીર ઈજા થયેલી અને ૨૯ માર્ચે સારવાર દરમિયાન તેમનું મૃત્યુ નીપજેલું.

આ ગુનામાં ચાર્જશીટ દાખલ થયા બાદ ભુજ સેશન્સ કૉર્ટે આરોપીઓની જામીન અરજી  ફગાવી દીધી હતી. આરોપીઓએ હાઈકૉર્ટમાં અરજી કરેલી. હાઈકૉર્ટે એક મહિલા આરોપી સોનબાઈ સંઘારને જામીન પર મુક્ત કરવા હુકમ કરેલો.

બચાવ પક્ષના વકીલે રજૂઆત કરેલી અરજદાર વૃધ્ધ અને બિમાર છે. લધાભાઈનું મૃત્યુ ઈજાથી નહીં પરંતુ યોગ્ય સારવાર નહીં મળવાના કારણે થયેલું. સામા પક્ષે, સરકારી વકીલ એસ.એ. મહેશ્વરી અને અને સિનિયર એડવોકેટ આર.એસ. ગઢવીએ દલીલ કરી હતી કે આરોપીની ગુનામાં સક્રિય અને પ્રથમદર્શનીય સંડોવણી છે. ફરિયાદી અને આરોપીઓ બેઉ એક જ ગામના છે તેથી જામીન પર મુક્ત કરાય તો આરોપીઓ ફરિયાદ પક્ષના સાક્ષીઓ, પુરાવા સાથે ધાક ધમકી કે ચેડાં કરી શકે તેમ છે.

ઉલ્લેખનીય છે કે વૃધ્ધ પર ત્રણ મહિલાઓએ કરેલા ઘાતકી હુમલાનો સમગ્ર બનાવ સીસીટીવી કેમેરામાં કેપ્ચર થઈ ગયો હતો.