મરણ જનાર સાક્ષી જેઠાલાલ ખાનીયા (રહે. ભારતનગર, ગાંધીધામ) સંસ્કાર કોલેજમાં બી.સી.એ.ના પ્રથમ વર્ષમાં અભ્યાસ કરતી હતી અને ભુજની ભાનુશાલી કન્યા છાત્રાલયમાં રહેતી હતી.

મોહિત તેના પ્રેમસંબંધ અંગે સાક્ષીના માતા પિતાને જણાવી દેવાની ધમકી આપતો હતો. મોહિતના વારંવાર ફોન કૉલના લીધે સાક્ષીએ તેનો મોબાઈલ નંબર પણ બ્લોક કરી દીધો હતો. બનાવના દિવસે સાક્ષીએ તેની માતાને પણ મોહિતની ધાક ધમકી અંગે વાત કરેલી.

ઉશ્કેરાયેલો મોહિત ગુસ્સામાં આવીને અંજારના મેઘપર બોરીચીના પરસોત્તમનગરમાં રહેતા મિત્ર જયેશ જેન્તીજી ઠાકોરના ઘરે ગયેલો. ત્યાંથી બેઉ જણ જયેશની મોટર સાયકલથી અંજાર આવેલા. મોહિતે અંજારમાં છરી-ચપ્પુની દુકાનમાંથી એક છરી લીધેલી. બેઉ જણે ભુજમાં સંસ્કાર કોલેજમાં આવીને કોલેજની અંદર અન્ય વિધાર્થીનીઓને ‘સાક્ષી ક્યાં છે?’ તે અંગે પૂછપરછ કરેલી.

સાક્ષીને જોઈ મારે વાત કરવી છે તેમ કહી મોહિતે તેને સાઇડમાં લઇ જઈને પેટમાં છરી મારી દીધી હતી. ઘાયલ સાક્ષી જયેશની બાઈક પર હોસ્પિટલમાં સારવાર માટે જતી હતી ત્યારે મોહિત બાઇકમાં સાક્ષીની પાછળ બેસી ગયેલો અને તેના ગળા પર છરી ફેરવી દીધી હતી. ગંભીર હાલતમાં સાક્ષીને સારવાર અર્થે હોસ્પિટલમાં દાખલ કરવામાં આવેલ પરંતુ મોડી રાત્રે તેનું મૃત્યુ નીપજ્યું હતું. ઝપાઝપી સમયે જયેશને પણ સામાન્ય ઈજાઓ પહોંચતા તેને જી.કે. જનરલ હોસ્પિટલમાં દાખલ કરાયેલો.

ઘટના અંગે ભુજ શહેર એ ડિવિઝન પોલીસ સ્ટેશનમાં સાક્ષીના પિતાએ મોહિત સિધ્ધપુરા અને તેના મિત્ર જયેશ ઠાકોર વિરુધ્ધ હત્યા સહિતની કલમો તળે ફરિયાદ નોંધાવી હતી. પીઆઈ એ.એમ.પટેલે ગણતરીના કલાકોમાં મોહિતને ભુજમાંથી ઝડપી પાડ્યો હતો. પાછળથી જયેશ ઠાકોરની ધરપકડ કરવામાં આવેલી.

તપાસ દરમિયાન પોલીસને મોહિત અને જયેશ બનાવના સમયગાળા દરમિયાન બાઇકથી ભુજમાં એન્ટર થયેલાં તે અંગેના નેત્રમ સી.સી.ટીવી. ફૂટેજ પુરાવા રૂપે એકત્ર કરેલાં. સાક્ષી પર હુમલા બાદ બાદ લોહીથી ખરડાયેલાં કપડાં બદલવા મોહિત જે દુકાનમાં નવા કપડાં ખરીદવા ગયેલો તે દુકાનના સીસીટીવી ફુટેજ પણ કબજે કરાયેલાં. મહત્વના સાક્ષીઓના BNSS કલમ ૧૮૩ મુજબ નિવેદનો નોંધવામાં આવેલાં. આરોપીઓ પાસેથી કબજે કરાયેલી છરી, કપડાં વગેરે પરીક્ષણ અર્થે એફએસએલમાં મોકલવામાં આવેલાં. જેનો પોઝિટીવ રીપોર્ટ આવ્યો હતો.

આ કેસમાં આજે પ્રિન્સીપલ સેશન્સ જજ દિલીપ પી. મહિડાએ ફરિયાદ પક્ષે રજૂ થયેલાં ૭પ દસ્તાવેજી પુરાવા અને ૩૧ સાક્ષીની જુબાનીના આધારે ખૂન કરનાર ૨૨ વર્ષિય મોહિત અને મદદગારી કરનાર ૨૨ વર્ષિય જયેશને દોષી ઠેરવી આજીવન કેદની સજા સાથે રપ રપ હજારનો દંડ ફટકાર્યો છે. કૉર્ટે ગુનાનો ભોગ બનનાર સાક્ષીના માતા પિતાને વળતર પેટે પ લાખ રૂપિયા ચૂકવવા જિલ્લા કાનૂની સેવા સત્તામંડળને હુકમ કર્યો છે.

આજના આ ચુકાદા પર સમગ્ર ભાનુશાલી સમાજની નજર મંડાયેલી હતી. આજે મોટી સંખ્યામાં કૉર્ટ ખાતે આગેવાનો અને સંબંધિતો ઉમટી પડ્યાં હતા. સૌના ચહેરાં પર જાણે કે ન્યાય થયો હોવાનો સંતોષ પ્રવર્તતો હતો.