ફરિયાદમાં ઈશાક પર આરોપ લગાડાયો હતો કે ૧૨-૧૦-૨૦૨૫ના રોજ તેણે રીન્યુએબલ એનર્જી પાર્કમાં કાર્યરત KEC કંપનીમાં સ્કોર્પિયો અને ટ્રક સાથે ગેરકાયદે રીતે પ્રવેશી, ધાક-ધમકી કરી કંપનીએ મુંબઈની N N Steel કંપનીને ટેન્ડરથી વેચેલો લાકડાનો સ્ક્રેપ કોઈપણ ઑથોરીટી લેટર બતાવ્યા વગર કે નાણાંની ચૂકવણી કર્યા વગર,  ધોકા અને પાઈપો સાથે આવેલા સાગરીતોના જોરે ધાક-ધમકી કરી બળજબરીથી લઈ ગયો હતો.

આરોપી વતી બચાવ કરતા એડવોકેટ બાબુલાલ ગોરડીયાએ કૉર્ટમાં જણાવ્યું હતું કે આરોપીએ દારૂના અડ્ડા પર જનતા રેઈડ કરેલી તેનું મનદુઃખ રાખીને ખોટી ફરિયાદમાં ફીટ કરી દેવાયો છે. ગોરડીયાએ આખો મામલો દિવાની પ્રકારનો હોવાનું જણાવી ઈશાકે N N Steel કંપની પાસેથી ખરીદેલા સ્ક્રેપ અને ટેક્સ ઈન્વોઈસ સહિતના દસ્તાવેજો પુરાવારૂપે કૉર્ટમાં રજૂ કર્યાં હતા.

કૉર્ટમાં દલીલ કરાઈ હતી કે જે-તે સમયે કથિત બનાવ અંગે કંપનીના પ્રોજેક્ટ મેનેજરે ખાવડા પોલીસ મથકે જે અરજી કરેલી તેની વિગતો અને એલસીબી પીએસઆઈ જેઠીએ કરેલી તપાસ બાદ દાખલ કરેલી ફરિયાદમાં લગાડેલા આરોપ મુજબના તેમાં કોઈ આક્ષેપ જ નથી!

સાતમા અધિક સેશન્સ જજ એન.પી. રાડીઆએ રજૂ થયેલાં દસ્તાવેજી આધારો, તપાસકર્તાની એફિડેવિટ વગેરે જોઈને ઠેરવ્યું કે પ્રથમદર્શનીય રીતે આ ગુનો દિવાની પ્રકારનો જણાય છે.

કોઈ વ્યક્તિ ગુનાહિત ભૂતકાળ ધરાવે છે તેટલા કારણ માત્રથી જામીન રદ્દ કરી શકાય નહીં. કૉર્ટે બેઈલ ઈઝ ધ રૂલનો પ્રસ્થાપિત સિધ્ધાંત જણાવીને પ્રી-ટ્રાયલ પનિશમેન્ટ નીવારવાના હેતુથી ઈશાક સમાને શરતી જામીન પર છોડવા હુકમ કર્યો છે.

કૉર્ટના ચુકાદાના પગલે એલસીબી દ્વારા ચોક્કસ કેસોમાં કરાતી કાર્યવાહી વધુ એકવાર ચર્ચાના એરણે ચઢી છે.