ગુજરાત ATSએ ૬ જાન્યુઆરી ૨૦૨૦ના રોજ કચ્છની જળસીમામાં ઓપરેશન હાથ ધરીને ફિશીંગ બોટમાં ૧૭૫ કરોડનું હેરોઈન લઈને ભારતમાં ઘૂસણખોરી કરનારાં પાંચ પાકિસ્તાનીને જખૌ પાસેથી પકડ્યાં હતા. આ ગુનામાં આજે ભુજની ખાસ NDPS કૉર્ટે ઈસ્માઈલ મોહમ્મદ જામ (ઉ.વ. ૫૦), અનીશ ઈશા ભાટી (ઉ.વ. ૩૦), અબુબકર હાસમ કુંગરા (ઉ.વ. ૭૦) અને અશર્રફ ઉસ્માન ભાટી (ઉ.વ. ૪૨)ને દોષી ઠેરવી ૨૦ વર્ષની સખ્ત કેદની સજા ફટકારી છે. એક આરોપીનું મૃત્યુ થતાં તેની સામેની ટ્રાયલ પડતી મૂકાઈ હતી.

૧૪-૦૪-૨૦૨૧ના રોજ ગુજરાત ATSએ જખૌ નજીક સમુદ્રમાંથી ૧૫૦ કરોડના ૩૦ કિલો હેરોઈન ભરેલી બોટ સાથે ૮ પાકિસ્તાનીઓની ધરપકડ કરેલી. આરોપીઓ પાકિસ્તાનના હૈદરી પોર્ટથી હેરોઈન લઈને ભારતમાં સપ્લાય કરવા ઘૂસેલાં. આ ગુનામાં ભુજની ખાસ કૉર્ટે મુર્તજા યામીન સિંધી (ઉ.વ. ૩૫), યામીન ઉમર સિંધી (ઉ.વ. ૬૫), મુસ્તફા યામીન સિંધી (ઉ.વ. ૩૩), નસરુલ્લા યામીન સિંધી (ઉ.વ. ૨૮), હુસૈન ઈબ્રાહિમ સિંધી (ઉ.વ. ૬૨), સાલેમામદ અબ્દુલ્લા સિંધી (ઉ.વ. ૭૦), મહંમદ યાસિન મહંમદ ઉર્સ મલ્લા (ઉ.વ. ૩૯) અને રફીક આમદ ઉસ્માનઅલી મુલ્લા (ઉ.વ. ૬૨)ને ભુજ કૉર્ટે ૨૦ વર્ષના સખ્ત કારાવાસની સજા ફટકારી છે.

એ જ રીતે, ૦૮-૧૦-૨૦૨૨ના રોજ ATSએ જખૌ નજીક ઓપરેશન હાથ ધરીને ફિશીંગ બોટ સાથે ભારતમાં ઘૂસેલાં પાંચ પાકિસ્તાનીની ૨૫૦ કરોડની કિંમતના ૫૦ કિલો હેરોઈન સાથે ધરપકડ કરેલી. આ ગુનામાં પાછળથી એક અફઘાની નાગરિકની સંડોવણી બહાર આવતાં તેની ધરપકડ કરાયેલી. આ કેસમાં કૉર્ટે અલી મોહમ્મદ બચ્ચન મલ્લા (૪૦), મમતાજ હારૂન મલ્લા (૩૦), શેર મોહમ્મદ બશરીયા બડ (૪૦), મોતીયા ઈદ્રીશ મલ્લા (૫૦), ઈબ્રાહિમ યુસુફ સમેજા (૬૮), ઝાહિદ અબ્દુલ્લા મલ્લા (૨૨) અને અફઘાનિસ્તાનના હેકમતુલ્લા નુરુલ્લાહની ધરપકડ કરેલી.

ત્રણે કેસ ભુજના ત્રીજા અધિક સેશન્સ જજ અને NDPS કૉર્ટના ખાસ જજ વી.એ. બુધ્ધ સમક્ષ ચાલ્યાં હતા. કૉર્ટે ત્રણે કેસના ૧૯ આરોપીઓને NDPS Actની કલમ ૮ (સી) અને કલમ ૨૩ (સી) હેઠળ ૨૦-૨૦ વર્ષના સખ્ત કારાવાસ સાથે પ્રત્યેકને બે-બે લાખનો દંડ ફટકાર્યો છે. ઉપરોક્ત બંને કલમો તળે અલગ અલગ સજા ભોગવવા કૉર્ટે હુકમ કર્યો છે. આ ગુનાઓમાં તપાસ દરમિયાન એક ભારતીય સહિત બે જણની ધરપકડ થયેલી પરંતુ કૉર્ટે તેમને નિર્દોષ છોડી મૂક્યાં હતા.

સજા સંભળાવતી વખતે કૉર્ટે જણાવ્યું કે ભારતના યુવાનોને નિશાન બનાવી આવા ગંભીર વ્યસનમાં ધકેલવાનું કૃત્ય સામાન્ય કૃત્ય ગણી શકાય નહીં. આરોપીઓએ મોટાં પ્રમાણમાં માદક પદાર્થો સપ્લાય કરવા પ્રયાસ કરીને રાષ્ટ્રના ઢાંચાને નબળો પાડવાનું સુનિયોજિત ષડયંત્ર ઘડેલું છે. નશાની સમસ્યા વ્યક્તિગત સ્તરે નહીં પરંતુ રાષ્ટ્રીય સ્તરે પણ સંકટ બની શકે તેમ છે અને દેશની આંતરિક સુરક્ષાને સીધી અસર કરી શકે તેમ છે. ત્રણે કેસમાં મુખ્ય જિલ્લા સરકારી વકીલ એચ.બી. જાડેજાએ હાજર રહીને સાક્ષીઓ તપાસીને દલીલો કરી હતી.