છત્તીસગઢથી કથાશ્રવણ માટે આવેલા એક પરિવારને આયોજકોએ શહેરના મુંદરા રોડ પર આવેલા સહજાનંદ પાર્કમાં ઉતારો આપ્યો હતો. ૨૯ ઓક્ટોબરની સવારે આ પરિવાર કથાશ્રવણ માટે આવેલો અને રાત્રે ઉતારા પર પરત ફર્યો ત્યારે અજાણ્યો ચોર ૯ તોલા સોનાના ઘરેણાં, ચાંદીની પાતળી ચેઈન, પાયલ અને ૩૦ હજાર રોકડાં રૂપિયા મળી ૨.૬૬ લાખની માલમતા ચોરી ગયો હોવાનું બહાર આવેલું.

ચોરીના આ બનાવ અંગે ભુજ શહેર એ ડિવિઝન પોલીસે ગુનો નોંધીને તપાસ હાથ ધરેલી. ગહન તપાસ દરમિયાન સીસીટીવીમાં એક શકમંદ શખ્સનો ચહેરો જોવા મળ્યો હતો. તપાસ કરતાં સ્પષ્ટ થયેલું કે આ શકમંદ શખ્સ અંજારના ભગતસિંહ નગર, ગાયત્રી ચોક ખાતે રહેતો હિરા રમેશ વડેચા (દેવીપૂજક) છે. પોલીસે પાકી ઓળખ કર્યા બાદ હિરાને દબોચી લેતાં તેણે સહજાનંદ પાર્કમાં કરેલી ચોરીની કબૂલાત આપી છે.

ભુજ એ ડિવિઝન પીઆઈ એ.એમ. પટેલે જણાવ્યું કે હિરા સાથે ચોરીમાં બાબુ ઊર્ફે બબુ કેશાભાઈ કુંવરીયા નામનો અન્ય એક સાગરીત પણ સામેલ રહેતો. હિરો ભંગારની લારીની ફેરીના નામે બંધ મકાનોની રેકી કરી ચોરી કરતો. આરોપીઓ પોતાની પાસે મોબાઈલ ફોન રાખતાં નથી. હિરાની પૂછપરછમાં બહાર આવ્યું છે કે ભુજના ત્રિમંદિર સામે આવેલા ગાર્ડન સીટી ફાર્મ હાઉસ બંગ્લૉઝના એક બંધ મકાનમાં પણ તેણે ગત જૂન માસમાં ચોરીનો નિષ્ફળ પ્રયાસ કરીને દરવાજા તોડીને નુકસાન પહોંચાડેલું. જે અંગે ૨૧ જૂનના રોજ ફરિયાદ દાખલ થયેલી.

એટલું જ નહીં, તેની સામે વર્તમાન વર્ષમાં રાજકોટના ધોરાજી અને વિંછીયા પોલીસ મથકે પણ બે-બે મળી ચોરીના ચાર ગુના નોંધાયેલાં છે.

હિરાની પૂછપરછમાં બહાર આવ્યું કે ચોરીનો માલ તેણે ભુજની રામનગરીમાં રહેતા ભરત કમલેશ દેવીપૂજકને વેચવા માટે આપ્યો હતો. પોલીસે ભરતને પકડીને પૂછપરછ કરતાં તેણે જણાવ્યું કે ચોરીનો માલ તેણે બેન્કમાં ગીરવે રાખીને લોન મેળવી હતી. પોલીસે સોનાના મંગળસૂત્ર, હાર, બુટ્ટી, વીંટી મળી ૫.૧૬ લાખની કિંમતના પાંચ ઘરેણાં રીકવર કર્યાં છે. બાબુ કુંવરીયા હજુ ઝડપાયો નથી. ગુનાના ડિટેક્શનમાં પીઆઈ એ.એમ. પટેલના માર્ગદર્શનમાં પીએસઆઈ આર.જે. ગોહિલ, હેડ કોન્સ્ટેબલ ભરતજી ઠાકોર, રાજુભા જાડેજા, યુવરાજસિંહ જાડેજા, લાખાભાઈ બાંભવા, કૈલાસભાઈ ચૌધરી, દશરથભાઈ ચૌધરી, મુકેશભાઈ તરાલ વગેરે સ્ટાફ જોડાયો હતો.