આપને જાણીને આઘાત લાગશે કે ભુજના સરકારી ચિલ્ડ્રન હોમમાંથી એક ૧૨થી ૧૪ વર્ષના ગૂમ થયેલાં એક બાળકનું અપહરણ થયું હોવાની ફરિયાદ ચિલ્ડ્રન હોમના જ અધીક્ષકે ૧ મહિનો અને ૧૧ દિવસે નોંધાવી છે!

ભુજના ચિલ્ડ્રન હોમ ફોર બોય્ઝના ઈન્ચાર્જ અધીક્ષક રશ્મિકાન્ત જયચંદ પટેલે આજે ભુજ બી ડિવિઝને સંસ્થામાંથી એક ૧૨થી ૧૪ વર્ષનો બાળક ૧૪-૦૯-૨૦૨૪ના રોજ બપોરે ૧૨થી ૨ના અરસામાં લાપત્તા થઈ ગયો હોવાની જાણ કરતાં પોલીસે સુપ્રીમ કૉર્ટની ગાઈડલાઈન મુજબ અજાણ્યા માણસો વિરુધ્ધ અપહરણની કલમો તળે ગુનો નોંધી તપાસ હાથ ધરી છે. કાયદાના સંઘર્ષમાં આવેલા બાળકોની કાળજી અને જતન રાખવાની જેની પાયાની ફરજ છે તે સંસ્થાએ છેક ૧ મહિનો અને ૧૧ દિવસે શા માટે ફરિયાદ નોંધાવી તે મુદ્દે કચ્છખબરે ફરિયાદ નોંધાવનાર ઈન્ચાર્જ અધીક્ષક રશ્મિકાન્ત પટેલ જોડે ફોન પર વાતચીત કરી પરંતુ વિલંબ અંગે કશી સંતોષકારક માહિતી ના મળી. તેમણે જણાવ્યું કે આ બાળકને છઠ્ઠી સપ્ટેમ્બરે ભુજોડી નજીક શિવશક્તિ હોટેલ પાસેથી બાળ સુરક્ષા એકમના અધિકારી ચિલ્ડ્રન હોમમાં લઈ આવ્યાં હતાં.

ભુજ બી ડિવિઝનના પીઆઈ વી.બી. પટેલે જણાવ્યું કે આ બાળકને ચિલ્ડ્રન હોમમાં રાખવામાં આવ્યો પરંતુ તેને ત્યાં ફાવતું ન હોઈ અગાઉ એક બે વાર ત્યાંથી સ્વેચ્છાએ જતો રહેલો. જે અંગે અમે તાત્કાલિક કાર્યવાહી કરી તેને શોધીને પરત ચિલ્ડ્રન હોમમાં મોકલી આપેલો.  ફરિયાદ દાખલ કરવામાં થયેલા વિલંબ અંગે પટેલે ચિલ્ડ્રન હોમ પર જવાબદારી ઢોળી દીધી. આ બાળક વડોદરાના વાઘોડિયા બાજુનો છે અને તેને ટ્રેસ કરી લેવામાં સફળતા મળી જશે તેવો આશાવાદ તેમણે દર્શાવ્યો.