હોસ્પિટલના સ્ટાફે ફાયર એક્સટીંગ્વિશરની મદદથી આગને ઓલવવા પ્રયાસો કરવા સાથે તત્કાળ ફાયર બ્રિગેડને જાણ કરતાં આગ વધુ પ્રસરે તે અગાઉ કાબૂમાં આવી ગઈ હતી. શહેરના ધમધમતાં રોડ પર આવેલી હોસ્પિટલની બારીઓમાં નીકળતાં ધુમાડાંના ગોટાં જોઈને લોકોની ભારે ભીડ એકઠી થઈ ગઈ હતી.

ડિલક્સ રૂમ સામે આવેલા જનરલ વૉર્ડમાં બે મહિલા દર્દી દાખલ થયેલી હતી. સામાન્યતઃ આગ લાગે ત્યારે ધુમાડાના કારણે ઑક્સિજનના અભાવે લોકો ગૂંગળાઈ જતાં હોય છે. ફાયર સ્ટાફે સૌપ્રથમ ધુમાડા વચ્ચે ફસાઈ ગયેલી બંને મહિલા દર્દીને સલામત રીતે બહાર કાઢીને અગ્નિશમન કામગીરી હાથ ધરીને ગણતરીની મિનિટોમાં આગ ઓલવી નાખી હતી.

ઉલ્લેખનીય છે કે ગુજરાતમાં અગાઉ હોસ્પિટલમાં લાગેલી ભીષણ આગની ઘટનાઓ બાદ ગુજરાત સરકારે કાયદામાં સુધારા કરીને કડક નિયમો અમલી બનાવ્યાં છે. આ ઘટનાએ કચ્છમાં કાર્યરત મોટી કોર્પોરેટ હોસ્પિટલોની અગ્નિશમન સજ્જતા અંગે વધુ એકવાર ચર્ચા છેડી દીધી છે.