ગઈકાલે શનિવારે રાત્રે આઠ વાગ્યાના અરસામાં લાશ મળી હતી.

મરણ જનાર શબ્બિર અલી જામ (મુસ્લિમ ગરાસિયા) હાજાપર ગામે મોટી બહેન અમીનાના પરિવાર જોડે રહેતો હતો અને છૂટક કડિયા કામ કરતો હતો. મૃતક શબ્બિર અને તેના મિત્ર શબ્બિર જાનમામદ કેવરે અગાઉ મથડા ગામે વાડી વાવનારા અરવિંદ જયંતીભાઈ સથવારાને દસ હજાર રૂપિયા આપેલાં.

શબ્બિર ગુમ થઈ જતાં શનિવાર સવારથી બહેન અમીના અને બનેવી નુરમામદ કટીયાએ શોધખોળ શરૂ કરેલી. શનિવારે સવારે ભાણેજ તાલિબે હાજાપરમાં રહેતા મૃતકના ભાઈ રફીકને પણ ફોન કરી મામા ગુમ થયાં હોવાનું અને તેને શોધવા પિતા શબ્બિરના મિત્ર ઓસમાણ ચાકીને લઈને ચંદિયા ગામ બાજુ ગયાં હોવાની જાણ કરેલી. જેથી રફીક પણ એક્ટિવા લઈને ચંદિયા ગયેલો.

શબ્બિર અરવિંદ પાસે રૂપિયા લેવા ગયો હોવાનું ઓસમાણ ચાકીએ જણાવ્યું હોઈ રફીક અને નુરમામદે અરવિંદને બોલાવી શબ્બિર વિશે પૂછપરછ કરી હતી. અરવિંદે તેમને એવો જવાબ આપેલો કે શુક્રવારે સાંજે ચારેક વાગ્યાના અરસામાં શબ્બિર તેની પાસે રુપિયા લેવા આવેલો. હું તેને મારા ઘેર લઈ ગયેલો અને મારી પત્નીએ તેને દસ હજાર રૂપિયા આપેલાં. બાદમાં હું શબ્બિરને મારી બાઈક પર ચંદિયા ગામે ઉતારી ગયેલો.

અરવિંદ સાચું બોલે છે કે ખોટું તે જાણવા મથડા અને ચંદિયા ગામના માર્ગ પરના સીસીટીવી કેમેરા ચેક કરાતાં આ બેઉ જણ બાઈક લઈને જતા આવતાં હોય તેવું ક્યાંય દેખાયું નથી. ઉલટું, અરવિંદ શુક્રવારે સવારે બે વખત હાજાપરમાં શબ્બિરના ઘેર તેની પૃચ્છા કરવો ગયો હતો.

શબ્બિરની ભાળ ના મળતા બહેને અમીનાએ ગઈકાલે સાંજે પધ્ધર પોલીસ મથકે તેની ગુમ નોંધ લખાવી હતી અને બે ત્રણ કલાક બાદ આઠ વાગ્યાના અરસામાં ગામની રાતી તલાવડી પાસે લોહીલુહાણ હાલતમાં પડેલી લાશ મળી આવી હતી.

લાશથી થોડેક દૂર લોહીના ધાબા જોવા મળેલાં છે, લાશને ઢસડીને અહીં લવાઈ હોય તેવા લિસોટા જોવા મળ્યાં છે તથા મીની લોડિંગ ટેમ્પો જેવા વાહનના ટાયરના પણ નિશાન જોવા મળ્યાં છે. શબ્બિરની હત્યા કરીને લાશને વાહનમાં લાવી અહીં ફેંકી દેવાઈ હોય તેવી આશંકા છે.

મૃતકના મોટા ભાઈ રફીકે મોડી રાત્રે આપેલી મર્ડરની ફરિયાદ દાખલ કરીને પોલીસે અરવિંદ સથવારા તથા શબ્બિર જોડે જુગાર રમવા બેઠેલાં પાંચથી સાત મિત્રોને બોલાવી સઘન પૂછપરછ શરૂ કરી છે. સ્થળ પર હાલ ફોરેન્સિક તજજ્ઞોની ટીમ દ્વારા વૈજ્ઞાનિક ઢબે પુરાવા એકત્ર કરવાની કામગીરી ચાલી રહી છે.