કામ-ધંધાની શોધમાં ભુજ આવેલા અખિલેશ શર્માએ પોતે જે સંબંધીના ઘરે રોકાયેલો તે સંબંધીની દીકરી પર જ નજર બગાડી હતી.

થોડાંક સમય બાદ પરિચિત મારફતે બાળાનું અપહરણ કરાવી, ઉદયપુર બોલાવી ત્યાંથી તેને દિલ્હી લઈ ગયેલો. દિલ્હીની એક હોસ્પિટલમાં રૂમ રાખીને દુષ્કર્મ આચરેલું. આ કેસમાં ૨૩ દસ્તાવેજી આધારો અને ૧૨ સાક્ષીઓની જુબાની તપાસીને ભુજની વિશેષ પોક્સો કૉર્ટના ખાસ જજ જે.એ. ઠક્કરે  અખિલેશ શર્માને પોક્સો એક્ટની કલમ ૬ હેઠળ દોષી ઠેરવી ૨૦ વર્ષની સખ્ત કેદ સાથે ૫૮ હજારનો દંડ ફટકાર્યો છે.

ઈપીકો કલમ ૩૭૬ હેઠળ પણ આરોપી દોષી ઠર્યો છે પરંતુ પોક્સો એક્ટની કલમ ૬ હેઠળ સજા મળતાં અલગથી સજા નથી કરી. ગુનાનો ભોગ બનનાર બાળાને વળતર પેટે દંડની રકમ ઉપરાંત વિક્ટિમ કોમ્પેન્સેશન સ્કિમ અંતર્ગત ૪ લાખ રૂપિયા ચૂકવવા જિલ્લા કાનૂની સેવા સત્તામંડળને હુકમ કર્યો છે. આ કેસમાં પ્રોસિક્યુશન તરફે મુખ્ય જિલ્લા સરકારી વકીલ એચ.બી. જાડેજાએ હાજર રહીને સાક્ષીઓ તપાસી દલીલો કરી હતી.