સામખિયાળીના ભાવેશ બાબુભાઈ મારાજ સાથે ભચાઉના મદિનાનગરમાં રહેતા લતીફને અગાઉ ઝઘડો થયેલો. ભાવેશનો ખાસ મિત્ર અલ્તાફ ગુલમામદ ખલીફા હતો. ૭ નવેમ્બર ૨૦૧૬ના રોજ લતીફે અલ્તાફને ફોન કરીને તું ભાવેશ જોડે ફરે છે તે સારું નથી, તેની જોડે ફરવાનું બંધ કરી દેજે તેમ કહી ધમકી આપેલી. અલ્તાફે ભાવેશ તેનો મિત્ર હોવાનું અને તેની જોડે ફરું તેમાં તને શો વાંધો છે? તો જવાબ આપેલો.

બાઈક પરથી નીચે ઉતરીને લતીફે ભાવેશના હાથ, પેટ, માથામાં છરીના ઉપરાછાપરી ૭ ઘા માર્યાં હતા. આ સમયે અસગરે ‘ભાવેશને જાનથી મારી નાખજે જીવતો રહેવો ના જોઈએ’ કહીને લતીફને ઉશ્કેર્યો હતો.

હુમલા બાદ સામખિયાળી પોલીસે લતીફ અને અસગર વિરુધ્ધ હત્યાનો પ્રયાસ, પૂરાવાનો નાશ, હથિયારબંધીના જાહેરનામાના ભંગની કલમો તળે ગુનો નોંધ્યો હતો. આ ગુનામાં મોટાભાગના સાક્ષીઓએ આપેલી સમર્થનકારી જુબાની, ઈજાની ગંભીરતા, આરોપીનો ગુનાહિત ભૂતકાળ સહિતના મુદ્દાને અનુલક્ષીને આજે ભચાઉના બીજા અધિક સેશન્સ જજ અંદલીપ તિવારીએ લતીફને ૭ વર્ષની સખ્ત કેદ સાથે ૨૫ હજાર રૂપિયાનો દંડ ફટકાર્યો છે.

આ કેસમાં પ્રોસિક્યુશન તરફે અધિક જિલ્લા સરકારી વકીલ ડી.એસ. જાડેજાએ દલીલો કરી હતી. 

સામખિયાળીના ગુનામાં લતીફ નાસતો ફરતો હતો. થોડાંક દિવસો બાદ ૨૨-૧૧-૨૦૧૬ના રોજ ભચાઉમાં તે જોવા મળતાં ભચાઉના પોલીસ હેડ કોન્સ્ટેબલ ભૂપેન્દ્રસિંહ મંગલસિંહ જાડેજા અને અન્ય સ્ટાફે તેને ઘેરીને પકડવા પ્રયાસ કરેલો.

આ ગુનામાં ગયા મહિનાની ૧૮ તારીખે ભચાઉ કૉર્ટે લતીફને દોષી ઠેરવીને ૩ વર્ષની કેદની સજા ફટકારી હતી.

લતીફ પર પિતરાઈ ભાઈની હત્યાનો પણ ગુનો નોંધાયેલો છે. હત્યાના પ્રયાસના બબ્બે ગુનામાં પાછળથી પોલીસે ઝનૂની લતીફને પકડીને જેલહવાલે કરેલો. જેલમાં ગયા બાદ વચગાળાના જામીન પર છૂટીને તે ફરાર થઈ ગયેલો. પોલીસથી બચવા તે અબડાસાના આરીખાણા ગામની એક વાડીમાં પત્ની જોડે છૂપાયેલો.

ત્યાંથી નાસેલો લતીફ ભુજ નજીક સણોસરા જદુરા ગામના જંગલ વિસ્તારમાં છૂપાયેલો. પોલીસે કોમ્બિંગ ઓપરેશન હાથ ધરી તેને ઝડપી પાડેલો. કોઠારામાં પોલીસ કર્મીની હત્યાના પ્રયાસના ગુનામાં ભુજ કૉર્ટે લતીફ, તેની પત્ની ઝરીના સહિતના પાંચ જણને ઑગસ્ટ ૨૦૨૪માં નિર્દોષ ઠેરવ્યાં હતા.