બુધવારે સાંજે ભરુચની ઝઘડિયા GIDCમાં માલ ખાલી કરવા મામલે દિલદાર ખાનનો ધાણેટીની જ અન્ય  પેઢી રવેચી ટ્રાન્સપોર્ટના ટ્રેલર ડ્રાઈવર જીતેન્દ્ર યાદવ સાથે ઝઘડો થયેલો.

જીતેન્દ્ર સાથે થયેલા ઝઘડાનો ખાર રાખીને રવેચી ટ્રાન્સપોર્ટના દિલીપ રામજી વરચંદ, ભાવેશ વાઘજી માતા, અલ્પેશ ઊર્ફે લાલજી રામજી વરચંદ અન્ય ચાર સાગરીતો સાથે નંબર પ્લેટ વગરની સ્કોર્પિયો કાર લઈને ભચાઉના વોંધ પાસે પહોંચ્યાં હતા. ધાણેટી પરત ફરી રહેલો દિલદાર ખાન ગત રાતે દસેક વાગ્યે વોંધની હોટેલમાંથી જમીને ટ્રેલર લઈને નીકળ્યો કે સર્વિસ રોડ પર તેની રાહ જોઈ રહેલી આ ટોળકીએ ફિલ્મી ઢબે ટ્રેલર આગળ સ્કોર્પિયો કાર ઊભી રાખીને દિલદાર ખાનને નીચે ઉતાર્યો હતો.

આ ટોળકી ભચાઉના લાયન્સનગર નજીક સેન્ટ ઝેવિયર્સના ખુલ્લાં મેદાનમાં દિલદાર ખાનને લઈ આવેલી. પ્લાસ્ટિકના પાઈપ, ધોકા અને ગડદા-પાટુથી ઢોર માર મારી સાતેય જણે એક ગરીબ ડ્રાઈવરને પોતાની તાકાત બતાવી હતી! દિલદાર ખાનને માર મારી, જાનથી પતાવી દેવાની ધમકી આપીને આ ટોળકી તેને સ્થળ પર મૂકીને સ્કોર્પિયોમાં નીકળી ગઈ હતી.

ઘટના અંગે મોડી રાતે ભચાઉ પોલીસે સાતે શખ્સો સામે અપહરણ સહિતની વિવિધ ધારા તળે ગુનો દાખલ કર્યો હતો.