બનાવની બપોરે હતભાગી બાળકીની માતા નહાવા ઈચ્છતી હતી. જેથી તેણે દીકરીને નજીકમાં રહેતા કાકાના ઘરની ટાંકીમાં પાણી છે કે નહીં તે જોઈ આવવા મોકલી હતી.

માતા પિતાએ તેને શોધવાનું શરૂ કરેલું પરંતુ ક્યાંય પત્તો મળ્યો નહોતો. શોધતાં શોધતાં રાત પડી ગયેલી પણ દીકરીનો કોઈ પત્તો મળ્યો નહોતો. જાણ થતાં આખું ગામ શોધખોળમાં જોડાયું હતું. વોટસએપ પર મેસેજ વાયરલ થતાં સામખિયાળીના તત્કાલિન પો.સ.ઈ. વી.જી. લાંબરિયા, ભચાઉના તત્કાલિન પીઆઈ એ,.એન. કરંગિયા સહિતનો પોલીસ કાફલો પણ સર્ચ ઓપરેશનમાં જોડાયો હતો.

પોલીસે મૃતદેહને પોસ્ટમોર્ટમ માટે જામનગર મોકલ્યો હતો. બાળકી જોડે કોઈએ દુષ્કર્મ આચરીને ગળું દબાવી તેની હત્યા કરી નાખી હોવાનો ઘટસ્ફોટ થયો હતો. ભચાઉના તત્કાલિન DySP કે.જી. ઝાલાના માર્ગદર્શનમાં સામખિયાળી પોલીસ ઉપરાંત LCB અને SOG જેવી ખાસ બ્રાન્ચોએ ગહન તપાસ કરીને ત્રીજા દિવસે માળિયા પાસેથી લાખાપરના જ ૨૨ વર્ષિય અપરિણિત આરોપી વિજય પ્રતાપ કોલી (મહાલિયા)ની ધરપકડ કરી હતી.

આ કેસમાં સરકાર તરફે રજૂ થયેલાં ૩૪ સાક્ષીઓ અને ૧૬ દસ્તાવેજી આધાર પુરાવા, સરકારી વકીલ ડી.એસ. જાડેજાએ અપરાધીને ફાંસીની સજા ફટકારવા કરેલી રજૂઆતને સાંભળ્યા બાદ ભચાઉ પોક્સો કૉર્ટના વિશેષ જજ અંદલિપ તિવારીએ વિજય કોલીને પોલીસે લગાડેલી તમામ કલમો તળે દોષી ઠેરવીને સખ્ત સજા ફટકારી છે. કૉર્ટે આરોપી પાસેથી વસૂલ થનારાં દંડના ૨૧ હજાર રૂપિયા ઉપરાંત વિક્ટીમ કોમ્પેન્સેસન સ્કિમ હેઠળ પાંચ લાખ રૂપિયાનું વળતર ચૂકવવા ડિસ્ટ્રીક્ટ લિગલ સર્વિસ ઑથરોટીને નિર્દેશ આપ્યો છે.