ખેતરમાં આવેલી ઓરડીમાં રમેશ તેની પત્ની કૈલાસ (ઉ.વ. ૩૦) તથા બે માસૂમ દીકરી અને એક દીકરા સાથે રહેતો હતો.

સોમવારની રાત્રે રમેશે તેની પત્ની કૈલાસને શાક રોટલી બનાવવાનું કહેતાં કૈલાસે રસોઈ બનાવવાનો ઈન્કાર કરેલો. જેથી ગુસ્સે ભરાઈને રમેશે તેના ત્રણે સંતાનોની નજર સમક્ષ ધોકાથી ક્રૂરતાપૂર્વક માર મારી હત્યા કરી નાખી હતી. હત્યા બાદ બે સંતાનને નજીક રહેતા અન્ય ભાગિયાના ઘેર મૂકીને નાસી ગયો હતો.

હત્યા કરીને નાસી છૂટેલાં રમેશે પરોઢે વતનમાં રહેતા પિતા બળવંતને ફોન કરીને પત્નીની હત્યા કરી નાખી હોવાનું જણાવ્યું હતું. પિતાએ આ અંગે પરિચિત નરપત બારીયાના ઘરે દોડી જઈને વાત કરતાં નરપત બારીયાએ રમેશના શેઠ કરસનભાઈને ફોન કરી જાણ કરેલી. જેના પગલે કરસનભાઈ તેમના પુત્ર વિજય સાથે સવારે સાત વાગ્યે ખેતરે દોડી ગયેલાં. ખેતરે જઈને જોયું તો કૈલાસની લાશ ઓરડી બહાર ખાટલાં પર પડેલી હતી. બાજુમાં ચાર વર્ષની દીકરી સૂતી હતી. બનાવના પગલે આસપાસ રહેતા અન્ય ખેત મજૂર પરિવારો પણ સ્થળ પર એકત્ર થઈ ગયેલાં.

લોકોએ ચાર વર્ષની દીકરીને ઊંઘમાંથી ઉઠાડીને પૂછ્યું ત્યારે તેણે કાલી-ઘેલી બોલીમાં જણાવ્યું હતું કે મારા બાપાએ માને શાક રોટલી બનાવવા કહેલું. માએ ના પાડતાં તેને ધોકાથી મારી હતી. કૈલાસના શરીરે ઠેર ઠેર ધોકાથી ગંભીર ઈજાઓ થયેલી. બનાવ અંગે વાડી માલિકના પુત્ર વિજય કરસન ગામીએ ભચાઉ પોલીસ મથકે રમેશ બારીયા વિરુધ્ધ હત્યાની કલમો તળે ફરિયાદ નોંધાવી હતી.

બનાવની તપાસ પીઆઈ ડી.ડી. ઝાલાએ હાથ ધરી છે.