મનુભાએ પોલીસને જણાવ્યું કે તેમનો એકનો એક પુત્ર  કિશોરસિંહ પરિણીત હતો. સંતાનમાં ૯ વર્ષની દીકરી અને ૧૩ વર્ષનો પુત્ર છે. તે છૂટક ટ્રક ડ્રાઈવીંગ કરતો હતો.

ત્રીજી સપ્ટેમ્બરે પુત્રવધૂએ સસરાંને જાણ કરેલી કે ગઈકાલે બીજી સપ્ટેમ્બરે છેલ્લે સાંજે સાડા પાંચ વાગ્યે પતિ જોડે વાત કરેલી ત્યારથી તેનો ફોન બંધ આવે છે. મનુભાએ આ અંગે મોરબી બી ડિવિઝન પોલીસ મથકે પણ જાણ કરેલી. દરમિયાન, ૬ઠ્ઠી સપ્ટેમ્બરે બપોરે ૧ વાગ્યાના અરસામાં અંદરથી બંધ રૂમમાંથી તેની લાશ મળી આવી હતી.

રૂમમાંથી પોલીસને ઝેરી જંતુનાશક દવા, મૃતકનો થેલો, પર્સ, મોબાઈલ ફોન અને એક નોટબૂક મળી આવી હતી. મરતાં અગાઉ કિશોરસિંહે નોટબૂકમાં મોરબીના ગેંડા સર્કલ પાસે આવેલી પટેલ કન્સલ્ટન્સીની ઑફિસમાં રહેલા અજાણ્યા શખ્સની ધમકીનો ઉલ્લેખ કરતાં એ મતલબનું લખાણ લખ્યું હતું કે ધંધામાં ખોટ જતાં લોનના હપ્તા ચૂકવી શકતો નથી એટલે તે ભાઈ બે મહિનાથી ચેક બાઉન્સના ખોટાં કેસમાં ફસાવી દેવાની ધમકી આપી રહ્યો છે,

લખાણમાં ધમકી આપનાર શખ્સના બે મોબાઈલ નંબર અને તેણે આપેલી ધમકી અંગેના સ્ક્રીનશોટના પુરાવા હોવાનું પણ લખ્યું છે. ભચાઉના પીએસઆઈ ડી.જે. ઝાલાએ મનુભા સોઢાએ આપેલી ફરિયાદના આધારે અજાણ્યા શખ્સ સામે આત્મહત્યાના દુષ્પ્રેરણ અંગે ફરિયાદ દાખલ કરી તપાસ હાથ ધરી છે.