બાતમીના આધારે પોલીસે નંદગામ પાસે સર્વિસ રોડ પર આવેલી ન્યૂ બાબા રામદેવ હોટેલ નજીક પ્લાસ્ટિકના કોથળાઓ સાથે ઊભેલાં રુદ્રપ્રધાન બાબુલાલ પ્રધાન (કુર્મી) (ઉ.વ. ૨૫ રહે. ગંજમ, ઓડિશા) અને પિન્ટુ બંસીધર દાસ (ઉ.વ. ૨૬, ગંજમ, ઓડિશા)ને દબોચી લીધા હતા. પ્લાસ્ટિકના કોથળાઓની અંદર એલ્યુમિનિયમના બે મોટાં ડબ્બા રાખેલાં હતા.

પોલીસે ડબ્બાઓ ખોલી ચેક કરતાં તેમાં કેરીનું અથાણું ભરેલું હતું. જો કે, બાતમી પાક્કી હોઈ પોલીસે અથાણું ખાલી કરાવતાં પોલીસની આંખમાં ધૂળ નાખાવાનો કારસો બહાર આવ્યો હતો. અથાણું ડબ્બાની ઉપરની સપાટી પર હતું અને વચ્ચે પ્લાસ્ટિકની ટેપથી ગોળ આડશ યા પડ બનાવેલું હતું જેની નીચે ગાંજો ભરેલો હતો.

પોલીસે ટ્રેનની ટિકિટ ચેક કરતાં બેઉ જણ ઓડિશાના જારસુગુડાથી ભુજ શાલિમાર ટ્રેનમાં બેસીને ગાંધીધામ આવ્યા હતા. બેઉ જણને ગાંજાની ખેપ મારવા પેટે પ્રતિ કિલોગ્રામ ૩ હજાર રૂપિયા મહેનતાણું મળવાનું હતું. જો કે, ઓડિશાના સપ્લાયર અને સ્થાનિક રીસીવર અંગે તેમણે અજાણતા વ્યક્ત કરી છે. બેઉ યુવકોની ઝીણવટભરી પૂછપરછ હાથ ધરાઈ છે.

ઓડિશાથી ટ્રેનો મારફતે ગુજરાતમાં વર્ષોથી મોટાપાયે જથ્થાબંધ ગાંજો સપ્લાય થતો રહ્યો છે. સામાન્ય રીતે ગાંજાનું છૂટક વેચાણ કરનારાં લોકો બે-પાંચ કિલો ગાંજા સાથે ઝડપાય છે પરંતુ મુખ્ય સૂત્રધારો કદી હાથ લાગતાં નથી. ત્યારે, બંનેની પૂછપરછમાં કચ્છથી ઓડિશા વચ્ચે ગાંજાના નેટવર્કનો પર્દાફાશ થાય તેવી શક્યતા છે.

એટલું જ નહીં, તપાસની ખામીઓ અને મજબૂત પુરાવાના અભાવે પાછળથી મોટાભાગના કેસોમાં આરોપીઓ જામીન મુક્તિ મેળવી ટ્રાયલમાં નિર્દોષ ઠરતાં રહે છે. હાલ આ કેસની તપાસ ગાગોદર પીઆઈ એમ.જે. હોણને સુપરત કરાઈ છે.