અંધારાનો લાભ લઈને હાથમાં છરી સાથે અચાનક ધસી આવેલો ૩૦ વર્ષિય મહેશ શિવરામ વેણવા (મારાજ) નિદ્રાધીન દેવાની છાતી પર ચડી બેઠેલો. દેવાના પેટ, છાતી, મોં, હાથ, પીઠ વગેરે અંગો પર છરી વડે આડેધડ ૩૭ જેટલાં ઘા ઝીંકી સ્થળ પર જ તેની હત્યા કરી નાખી હતી.

રેખાએ ઝૂંપડી બહાર આવી રાડારાડ કરતાં અડધો કિલોમીટર દૂર જીરુંના પાકનું રખોપું કરતો જેઠ શૈલેષ ત્યાં દોડી આવ્યો હતો. શૈલેષને જોઈ મહેશ નાસી છૂટ્યો હતો.

બનાવ અંગે શૈલેષે મહેશ વિરુધ્ધ ફરિયાદ નોંધાવેલી. મૃતક દેવો, મોટો ભાઈ શૈલેષ અને આરોપી પિતરાઈ મહેશ સૌ વરણું ગામના રહેવાસી છે. દેવો અને શૈલેષ મોમાયમોરામાં ભાગવે ખેતી કરતાં હતા. એક વર્ષ અગાઉ મહેશ પણ બેઉ ભાઈઓ સાથે અહીં ખેતી કામ કરતો હતો. તે સમયે સૂવાની બાબતને લઈ મહેશ અને દેવા વચ્ચે ઝઘડો થયેલો. તેની અદાવત રાખીને મહેશે દેવાને નિદ્રાધીન હાલતમાં તેની પત્ની અને ચાર સંતાનોની નજર સમક્ષ ક્રૂરતાથી રહેંસી નાખ્યો હતો.

આ ગુનામાં ૨૬ સાક્ષીઓ અને ૨૩ દસ્તાવેજી આધાર પુરાવા અને બંને પક્ષના વકીલોની દલીલો સાંભળીને ભચાઉના ત્રીજા અધિક સેશન્સ જજ અંદલિપ તિવારીએ મહેશને હત્યા કરવા બદલ ઈપીકો કલમ ૩૦૨ હેઠળ દોષી ઠેરવી સખ્ત આજીવન કારાવાસ અને પાંચ હજાર રૂપિયાનો દંડ ફટકાર્યો છે.

આ કેસમાં સરકાર તરફે એડવોકેટ ધર્મેન્દ્રસિંહ એસ. જાડેજા અને એમ. આર. જાડેજાએ દલીલો કરી હતી. આડેસરના તત્કાલિન પીએસઆઈ વાય.કે. ગોહિલે તપાસ કરી હતી. ઉલ્લેખનીય છે કે ગુરુવારે ભચાઉ કૉર્ટે મોબાઈલ ફોન લૂંટવા માટે ભચાઉમાં યુવકની હત્યા કરનાર શબ્બિર ભટ્ટીને સખ્ત આજીવન કારાવાસ ફટકાર્યો હતો. શુક્રવારે રાપરના ધબડામાં આધેડની હત્યા મામલે પિતા અને તેના બે પુત્રોને સજા ફટકારી હતી.